Formasaun katalaun konvida ona Chapecoense ba jogu amigável ida iha Troféu Joan Gamper ne'ebé koñesidu.
Prezidente ne'ebé hala'o daudaun funsaun iha Chapecoense, Iván Tozzo, konfirma ona iha loron-sesta ne'e ba rádiu katalaun ida katak klube brazileiru futebol nian aseita ona konviti hosi FC Barcelona hodi halo jogu ida hosi prova koñesidu Troféu Joan Gamper, iha 2017.
"Hanesan ksolok boot ida mai ami no ami agradese ba FC Barcelona ne'ebé konvida ona ami. Sei hanesan priviléjiu ida no ksolok boot hodi joga iha Europa", Tozzo hatete iha entrevista ba emisora RAC1.
Intensaun hosi klube katalaun ne'e maka halo homenajen ba ema na'in 71 ne'ebé mate, iha loron 29 Novembru, bainhira aviaun hosi kompañia aéreu Lamia monu, iha kilómetru 17 hosi aeroportu Medellín, iha Kolómbia, ho ema na'in 77 iha aviaun laran, entre sira maka komitiva hosi Chapecoense, ne'ebé atu halo jogu dahuluk iha final hosi Tasa Súl-Amerikanu iha sidade kolombianu ne'e.
Entre vítima sira ne'ebé mate iha asidente, iha jogadór na'in 19 hosi jogadór na'in 22 hosi klube brazileiru ne'e, nune'e mós dirijente sira, ekipa tékniku, konvidadu sira ho jornalista sira, aleinde tripulasaun. Ema na'in neen sobrevive iha asidente, jogadór na'in tolu, tripulante na'in tolu no jornalista na'in ida.
Ekipa minhota sai dependente ba rezultadu iha Turkia no golu hosi Gent iha tempu prolongamentu elimina SC Braga.
Foto: Lusa
Sporting Braga elimina hosi futeból Liga Europa, ne’ebé halakon hosi Shakthar Donetsk (4-2) no haree Gent joga iha uma Konyaspor (1-0), iha daneen no jornada ikus Grupu H nian.
Tama iha ona, ekipa Paulo Fonseca laiklui titular barak , maibé ikus mai manán ho golu hosi Kryvtsov ( minutu 22 no 62) no Taison (39 no 66), kabe ba Stoiljkovic (43) no Vukcevic (89) reduz ba brakarense, ne’ebé bainhira remata ninia enkontru tama tiha ona, maibé iha minutu 90+4 Gent marka golu ida iha uma Konyaspor nian, ultrapassa portugés sira iha pozisaun daruak.
Ho nune’e, Shakhtar manán iha grupu pontu 18, rezultadu hosi vitória dalaneen iha enkontru sira seluk no Gent termina ho pontu 8, liu rua duké Sporting Braga ho hitu duké Konyaspor.
Hotu ona faze hosi grupu sira Champions League nian. Hatene iha ne'e ekipa sira ne'ebé liu ba oitavu final.
Hosi jogu sira loron-kuarta nian, ne'e hanesan rezultadu ikus sira hosi faze grupu sira Champions League nian, nune'e mós bele haree ekipa sira ne'ebé liu, lakon no sira ne'ebé maka ba iha Liga Europa.
Benfica ho FC Porto la'o ba oin no Sporting despede hosi kompetisaun europeiu sira nian.
Ekipa sira ne'ebé la'o ba oin: Benfica, Nápoles, PSG, Arsenal, Barcelona, Manchester City, Atlético de Madrid, Bayern, Monaco, Leverkusen, Dortmund, Real Madrid, Leicester, FC Porto, Juventus ho Sevilha.
Ekipa sira ne'ebé muda ba Liga Europa: Ludogorets, Besiktas, Monchengladbach, Rostov, Tottenham, Legia Varsóvia, Copenhaga, Lyon.
Ekipa sira ne'ebé sai hosi kompetisaun europeia sira nian: PSV, Celtic Glasgow, Dinamo de Kiev, Basileia, Dinamo Zagreb, Club Brugge, Sporting, CSKA Moscovo, PSV Eindhoven.
Kapitaun Real Madrid nian hatete katak akuzasaun sira hosi evazaun fiskal hosi futebolista "merengue" balun, entre sira maka Cristiano Ronaldo, mosu hodi dezestabiliza ekipa española.
AFP Photo@ Pau Barrena
Kapitaun Real Madrid nian, Sérgio Ramos, konsidera iha loron-tersa katak akuzasaun foun sira ba evazaun fiskal ba futebolista "merengue" balun, entre sira maka Cristiano Ronaldo, mosu hodi dezestabiliza ekipa española.
"Iha duni bosok no loos, maibé ha'u hanoin katak sira tenta dezestabiliza grupu iha momentu ida ne'ebé di'ak hela", refere hosi Sérgio Ramos, bainhira hatán kona-ba ‘Football Leaks’ iha abordajen ba jogu loron-kuarta ho Borussia Dortmund, ba jornada ikus hosi Champions League.
"Hanesan tema ida ne'ebé susar tebes, maibé ha'u hanoin katak labele afeta jogadór ruma no liuliu dezempeñu ekipa nian", Sérgio Ramos hatete no hatutan katak asuntu sei la afeta rendimentu Real Madrid nian.
Iha loron-sesta, membru sira hosi European Investigative Collaborations (EIC), ne'ebé inklui Expresso, Der Spiegel, El Mundo, austríaku Der Falter, belga Le Soir, dinamarkés Politiken, italianu L’Expresso, grupu fransés Mediapart, sérviu Newsweek ho romenu RCIJ The Black Sea, fó sai notísia katak Cristiano Ronaldo, karik, subar euro millaun resin iha impostu liuhosi sosiedade ida iha Illa Virjen sira.
Informasaun, ne'ebé envolve mós jogadór sira seluk, entre sira maka Fábio Coentrão, Ricardo Carvalho ka Pepe, nune'e mós internasional alemaun Mesut Ozil, hosi Arsenal, hetan hahú hosi dokumentu sira 1.900 gigabytes ne'ebé refere konsórsiu europeu hetan asesu no kona-ba jornalista sira hamutuk na'in 60 serbisu durante fulan hitu resin nia laran.
Tuir dokumentu sira, ne'ebé haktuir hosi OCS hosi plataforma dijital ‘Football leaks’, katak iha jogador koñesidu barak hosi futebol internasional ne'ebé halo esforsu hodi subar sira nia rendimentu ba fisku, hodi fó ezemplu loloos hanesan Ronaldo no Ozil.
Deskonfia katak avansadu portugés, tuir El Mundo, uza empreza bosok sira ho sede iha Illa Virjen hodi subar osan sira publisidade nian hamutuk eurp millaun 150 no, tuir Der Spiegel, kolaborador balun ne'ebé koñese di'ak Ronaldo senti preokupadu ho posibilidade hosi detalle sira hosi sosiedade karibeña nian bele to'o iha autoridade sira nia liman laran.
Maibé, Gestifute, hosi ajente Jorge Mendes nian, ne'ebé reprezenta interese sira hosi Cristiano Ronaldo ho José Mourinho, hatete ona, iha loron-kinta, iha deklarasaun públiku ida katak sira na'in rua halo tuir sira nia obrigasaun fiskal sira, iha España no mós iha Reinu Unidu.
Iha deklarasaun hanesan, ne'ebé haruka ba Ajénsia Lusa, Gestifute hatete katak Cristiano Ronaldo ho José Mourinho nunka envolve iha prosesu judisial ruma ne'ebé iha relasaun ho prátika krimi fiskal no ameasa katak asaun hodi bosok ka akuzasaun ida hanesan ne'e hasoru sira na'in rua sei hato'o ba tribunal.
Mundo Deportivo fó sai katak jogador ho Real Madrid akompãna hela rezultadu hosi votasaun nian.
Tuir notísia hosi jornal katalaun Mundo Deportivo, Cristiano Ronaldo maka sai duni vensedór hosi Ballon d'Or 2016, prémiu ne'ebé fó hosi France Football.
Diáriu ne'e hakerek katak jogador ho Real Madrid akompaña hela rezultadu hosi votasaun ne'ebé halo hosi France Football, rezultadu ne'ebé sei fó sai ofisial iha loron-segunda, 12 Dezembru.
Tuir Mundo Deportivo, sei akontese iha loron-kinta entrevista baibain no sesaun fotográfiku ho vensedór hosi Ballon d'Or, ne'ebé sei entrega ba Ronaldo iha Santiago Bernabéu.
Middlesbrough simu no manán iha ohin hasoru Hull City ho 1-0, iha jogu ne’ebé taka jornada 14.ª futeból Liga ingleza, sa’e ba okupa iha fatin 13.º, grasa ba golu ida hosi eis-jogadór ‘tigres’.
Médiu uruguai Gaston Ramirez, ne’ebé liuhosi Hull City iha metade daruak epóka 2014/15, deside taka rezultadu finál iha minutu 60, hafoin assisténsia hosi avansadu dinamarkés Viktor Fischer.
Ho rezultadu ne’e, ekipa Middlesbrough hakat liu fatin tolu iha klasifikasaun nian, ba klasifikasaun 13.º, ho pontu 15, enkuantu Hull City mantein iha klasifikasaun 19º no besik liu ba ikus, ho pontu 11, hanesan ho ida ikus, maka Swansea.
Liga ingleza ne’e lidera hosi Chelsea, ho pontu 34, tuir Arsenal, ho 31, no Liverpool nomós Manchester City, datoluk no klasifikasaun dahaat, hamutuk ho pontu 30.
Jogadór fransés elojia ona rival sira ne'ebé halo parte ba prémiu jogadór di'ak liu iha mundu.
Foto@ Paco Campos / EPA
Antoine Griezmann, finalista ida entre finalista na'in tolu ne'ebé konkore ba prémiu jogadór di'ak liu iha mundu ne'ebé fó hosi FIFA, aponta ona kualidade di'ak sira hosi rival na'in rua ne'e.
"Hosi Messi, ha'u hakarak iha nia jeitu, fasilidade hodi halo buat sira iha kampu. Remate ida, pase ida...parese ba nia buat hotu hanesan fásil. Hosi Cristiano ha'u hakarak iha kapasidade serbisu nian. Serbisu maka'as loron-loron hodi hadi'a beibeik", hatete hosi jogadór fransés ba kanal RTL.
Griezmann hatete mós katak nia simu hanesan normal hipóteze maka'as katak Cristiano Ronaldo konsidera hanesan di'ak liu: "Nia halo ona époka di'ak ida, Manán ona Europeu, Champions...".
Chelsea okupa mesak iha lideransa ho pontu 34, liutolu duké Arsenal, haat duké Liverpool no Manchester City.
Foto: EPA/PETER POWELL
Jürgen Klopp hatudu desportivizmu boot hodi assume katak Bournemouth merese manán Liverpool, iha jogu ba jornada 14.ª Liga Ingleza nian. ´Reds` ukun ho 3-1 to’o minutu 64 maibé adversáriu fila fali rezultadu. Tékniku Liverpool ne’e elojia reasaun hosi adversáriu.
"Hanesan vitória ida ne’ebé merese hosi parte Bournemouth. Parabéns ba sira nia ezibisaun. Ha’u hakarak ami sai ekipa ida di’ak liu hosi parte barak liu iha jogu, maibé iha momentu desizivu ami husik buat hotu lakon. Ami loke oda-matan no Bournemouth aproveita ho máximu. Sita mantein nafatin iha jogu no marka golu fantástiku, tanba ne’e sira merese", haktuir tékniku ba ´Sky Sports`.
Alemaun ne’e hatutan tan katak derrota laestraga Liverpool husik ninia dalan maibé serve hanesan alerta ba jogadór sira.
"Iha buat barak maka atu aprende. Esperiénsia ida ne’ebé laiha ema ida hakarak liu, maibé dalaruma tenki presiza. Iha deit pontu tolu, laliu duké ida ne’e. Labele sai kampeaun iha dezembru, nein tuun hosi divizaun. Kria deit baze ida no sei di’ak hela ", nia afirma.
Chelsea okupa mesak ona iha lideransa ho pontu 34, liutolu duké Arsenal, haat duké Liverpool no Manchester City.
Klube nipóniku hamutuk ona ho Atlético Nacional, Real Madrid, Jeonbuk Hyundai Motors, Mamelodi Sundowns, América do México ho Auckland City iha Mundial Klube sira nian.
@AFP Photo
Kashima Atlers sai kampeaun japunés futebol nian iha loron-sábadu bainhira halakon Urawa Reds, ho 2-1, hodi garanti vaga iha Mundial Klube sira nian ne'ebé fó ba kampeaun hosi nasaun organizadór eventu nian.
Jogu ne'e la hahú fásil ba Kashima Antlers, ne'ebé haree nia avansadu Shinzo Koroki adiata Urawa Reds, iha minutu hitu, maibé Mu Kanazaki empata iha parte dahuluk no aumenta iha penalti, iha minutu antes antes jogu hotu, hodi fó títulu ba nia ekipa, ne'ebé lakon 1-0 iha nia kampu rasik iha jogu dahuluk no agora manán ho 2-1.
Jogu ne'ebé garanti títulu ba dala ualu iha Kashima Antlers nia istória hanoin mós ho minutu nonook ida hodi fó homenajen ba vítima sira hosi asidente aviasaun nian ne'ebé halo jogador maioria mate hosi ekipa brazileiru Chapecoense.
Klube nipóniku hamutuk ona ho kolombianu Atlético Nacional (kampeaun Tasa Liberador nian), ba españól Real Madrid (Champions League Europa nian), ba ekipa súl-koreanu Jeonbuk Hyundai Motors (Ázia), súl-afrikanu Mamelodi Sundowns (Áfrika), ba América do México (Amérika-Norte) hp neozelandés Auckland City (Oseánia) iha Mundial Klube sira nian ne'ebé sei hala'o iha Japaun entre loron 08 no 18 Dezembru.
Treinadór portugés nomeadu hamutuk ho Zidane ho Ranieri ba galardaun.
Fernando Santos tama entre treinadór na'in tolu di'ak liu tinan 2016 ba FIFA. Selesionador portugés hanesan finalista ida hosi prémiu "Treinadór di'ak liu tinan 2016" ne'ebé sei fó hosi organizasaun ne'ebé kaer futebol mundial iha loron 09 Janeiru 2017. "Adversáriu" na'in rua seluk hosi tékniku luzu nian iha luta ba prémiu ne'e maka Zinedine Zidane ho Claudio Ranieiri.
Konkista ba Kampeonatu Europa nian ho Portugal hanesan "trunfu" boot ida Fernando Santos nian iha nomeasaun ba ida ne'ebé di'ak liu iha tinan ne'e. Treinador lori ekipa luzu hodi hetan konkista inéditu ida hasoru Fransa ne'ebé joga iha sira nia uma iha final iha Saint-Denis.
Selesionador nia dalan ho Portugal la hahú di'ak, Fernando Santos to'o iha komando tékniku Portugal nian ho kastigu tanba insidente sira bainhira sai nu'udar selesionador Grésia nian. Hafoin jogu rua kastigu nian, portugés kaer ekipa no manán dala hitu iha jogu hitu. Iha Europeu, kampaña to'o final hetan beibeik asidente ho apuramentu ida iha faze grupu sira nian iha fatin datoluk ne'ebé hakotu ho konkista istóriku ida ba futebol portugés nian.
Iha portugés nia dalan ba troféu treinadór di'ak liu tinan nian iha Zinedine Zidane ho Claudio Ranieiri. Fransés to'o iha lista hafoin konkista tiha Champions League ho Real Madrid. Ekipa "merengue" ba Milaun hodi halakon Atlético Madrid iha penalidade. Iha kampeonatu españól, Zidane lakon ona títulu ba Barcelona hosi Luís Enrique nian.
Ranieri hanesan finalista mós hafoin konkista tiha Premier League ho Leicester City. Tékniku italianu halo ona asaun estraordináriu ida ne'ebé ema ida la imajin no lori títulu kampeaun nian hosi eskalaun dahuluk ne'ebé inéditu ba formasaun "foxes" nian. Aleinde troféu kampeaun nian, Ranieri garanti mós prezensa dahuluk hosi ekipa nian iha faze grupu sira Champions League nian.
Finalista na'in tolu ne'e hili hosi lista ida ho kandidatu na'in 10 ne'ebé iha lista ne'e antes inklui: Diego Simeone (Atlético de Madrid), Luís Enrique (Barcelona), Pep Guardiola (Bayern Munique/Manchester City), Chris Colema (Wales), Didier Deschamps (Fransa), Mauricio Pochettino (Tottenham Hotspurs) ho Jurgen Klopp (Liverpool).
Fernando Santos hanesan treinador portugés daruak ne'ebé maka nomeadu ba treinadór di'ak liu tinan nian. Antes selesionadór ne'e, Mourinho de'it maka konsege nomeasaun iha okaziaun tolu: 2010 (nia manán prémiu), 2011 ho 2012.
