Adeptu sira sei vota hodi hili jogador di'ak liu iha mundu hosi FIFA
Partisipasaun hosi públiku, liuhosi votasaun online, hanesan novidade ida ba prémiu hosi FIFA.
Kandidatu na'in 23 ba futebolista di'ak liu iha mundu ba tinan 2016 sei hetan partisipasaun hosi públiku, ho votasaun online, novidade ida ba prémiu hosi FIFA, ne'ebé fila ba modelu ida hosi prémiu úniku.
To'o tinan 2009, organizmu aas hosi futebol ne'e, tinan-tinan, fó prémiu jogadór di'ak liu tinan nian, maibé iha tinan 2010 FIFA halibur prémiu seluk koñesidu, Bola Osan-Mean, hosi revista franseza France Football, hodi hili "ho lian ida de'it" ida ne'ebé di'ak liu.
Tinan ne'e, distinsaun sira sei hanesan singular, ho FIFA iha semana fó sai nomeadu sira ba treinador sira, iha femininu (fó sai iha loron-tersa) no maskulinu (iha loron-kuarta) no jogador sira (feto iha loron-kinta no mane sira iha loron-sesta).
"Di'ak liu ba tinan 2016", iha kategoria oioin, sei iha, hanesan uluk, votasaun hosi kapitaun no selesionador sira, maibé iha 50%, no persentajen sira seluk sei iha públiku "nia liman laran" no hosi painel ida hosi jornalista hamutuk na'in 200 resin hosi mundu tomak.
"Akontesimentu ne'e iha ligasaun ho futebol no ho partisipante sira ne'ebé hadomi tebes futebol: jogador sira, treinador sira no adeptu sira. Hanesan eventu foun ida, ho abordajen oinseluk hodi selebra jogu ida ne'ebé ema hotu hadomi", refere hosi prezidente FIFA, Gianni Infantino.
Kona-ba lista hosi France Football, ne'ebé atribui mesak Bola Osan-Mean, númeru hosi jogador kandidatu sira iha faze dahuluk ne'e maka na'in 50 no iha lista ne'e iha naran hosi internasional portugés sira Cristiano Ronaldo, Pepe ho Rui Patrício.
Kapitaun hosi selesaun portugeza, Cristiano Ronaldo, ne'ebé iha tinan 2016 manán ona Champions League ho Real Madrid no manán títulu europeiu ho Portugal, manán ona iha 2008 prémiu hosi FIFA no iha tinan 2013 no 2014 manán prémiu hamutuk entre organizmu ne'e ho France Football.
Iha tinan 2008, Cristiano Ronaldo hetan mesak prémiu rua, manán nu'udar futebolista di'ak liu iha mundu hosi FIFA no mós Bola Osan-Mean hosi France Football.
Distinsaun hosi Bola Osan-Mean akontese hahú hosi tinan 1056 - Eusébio manán iha tinan 1965 no Luís Figo manán iha tinan 2000 -, no hosi FIFA akontese dezde tinan 1991 ho Figo hetan prémiu iha tinan 2001.
@SAPO Desporto