Saltar para: Post [1], Comentar [2], Pesquisa e Arquivos [3]

SAPO Desportu TL

Sex | 10.05.19

Atleta timoroan sira sei sai hanesan embaixador hosi dezenvolvimentu sustentável

SAPO TL

Atleta timoroan sira, balun ho aspirasaun hodi bele kualifika ba kompetisaun internasional sira, sei sai hanesan reprezentante hosi Objetivu sira hosi Dezenvolvimentu Sustentável (ODS) iha Timor-Leste, hafoin akordu ida ne'ebé asina iha loron-sesta ne'e ho ONU.

timor_leste_bandeira.jpg

Reprezentante sira hosi Komité Olímpiku Nasional Timor-Leste nian no misaun ONU nian iha Timor-Leste asina, iha loron-sesta ne'e, iha Díli akordu ida ne'ebé sei hili atleta timoroan oioin nu'udar "Embaixador sira hosi Desportu ba Dezenvolvimentu Sustentável".

 

Akordu, ne'ebé hakarak ajuda fó koñese entre joven sira importánsia hosi dezenvolvimentu sustentável no knaar saida maka asumi hosi lideransa iha sira nia komunidade, asina ona iha Díli.

 

Ba kordenador rezidente ONU nian, Roy Trivedy, desportu bele hanesan fasilitador ida ba dezenvolvimentu sustentável ho dame nian.

"Desportu promove toleránsia ho respeitu. Bele hametin disiplina no promove serbisu iha ekipa. Bele kontribui mós ba aumentu hosi poder hosi feto sira no joven sira, indivídiu sira ho komunidade sira, aleinde impulsiona objetivu sira saúde nian, edukasaun nian no inkluzaun sosial", refere.

 

Visi-prezidente hosi Komité Olímpiku timoroan, Mateus da Cruz de Carvalho, hatete ona katak akordu sei permiti hametin esforsu sira hodi inspira ho halibur timoroan sira liuhosi exelénsia ho susesu desportivu.

"Ami nia organizasaun buka nafatin dalan hodi promove atleta sira Timor-Leste nian, la'ós de'it hodi hadi'a dezempeñu iha sira nia kampu desportivu sira, maibé mós hodi sai hanesan modelu sira iha sosiedade, lidera atividade komunitáriu sira", nia hatete.

 

Nia esplika tanba ne'e COTL hakarak "insentive partisipasaun iha desportu hanesan dalan ida hodi harii karákter, hodi mantén saudável, prezerva meiu ambiente ho promove harmonia no interasaun sosial".

 

Grupu hosi atleta sira ne'ebé sei partisipa iha proketu agora sei hetan selesaun, entre sira barak, nu'udar "embaixador sira dezenvolvimentu nian", bele partisipa iha kampeonatu mundial sira natasaun nian, iha Asian Games no iha Olímpiku sira iha tinan oinmai.

 

Objetivu hamutuk 17 hosi Dezenvolvimentu Sustentável adopta ona hosi líder mundial sira hodi insentiva nasaun sira hodi foti medida sira hodi hakotu ho dalan sira pobreza nian, kombate dezigualdade no kombate mudansa klimátiku nian, no objetivu sira seluk.

 

Iha fulan-Outubru, iha Asian Games, atleta timoroan sira konkista ona medalla dahuluk sira iha kompetisaun internasional ida.

Teófilo Freitas, ne'ebé konkista ona medalla osan-mean rua, no Pascoela dos Santos Pereira, ne'ebé konkista bronze - medalla dahuluk sira ba Timor-Leste -, simu hanesan asuwa'in iha loron-domingu liubá bainhira sira to'o iha Díli hafoin kompete tiha iha edisaun datoluk hosi Asian Para Games.

 

Teófilo Freitas, ne'ebé iha difikuldade hodi book aan, halo ona istória ho konkista medalla osan-mean dahuluk ba Timor-Leste iha kompetisaun internasional ida, ho vitória sira iha metru 400, ne'ebé hetan ona rekord aziátiku ida, no iha metru 1.500, ho rejistu máximu hosi kompetisaun.

Iha loron ikus prova nian, iha metru 1.500, Freitas hetan tempu 4.32,74, halakon tailandés Surasaj Damchoom ho irakianu Ali Rsaitmawi.

 

Atleta konkista, iha loron balun antes, medalla osan-mean dahuluk bainhira estabelese rekord aziátiku ida iha metru 400 iha final prova nian.

 

Vídeo hosi serimónia entrega medalla sira nian no hinu timoroan nian, iha lian portugeza, toda iha estádiu iha Jakarta, fahe dalabarak iha rede sosial sira.

Atleta dahuluk ne'ebé maka halo istória - fó medalla dahuluk ba Timor-Leste -, maka Pascoela dos Santos Pereira ne'ebé maka konkista ona medalla bronze iha ténis-meza.

 

Fonte: Ajénsia Lusa

Comentar:

Mais

Se preenchido, o e-mail é usado apenas para notificação de respostas.