Atleta timoroan sira selebra medalla dahuluk iha Jogu sira Sudeste Aziátiku nian
Inbrolia Amorim dos Reis sai nu'udar atleta timoroan dahuluk ne'ebé konkista medalla ida - bronze iha taekwondo -, iha Jogu sira Sudeste Aziátiku (SEA) nian ne'ebé halo iha Filipina, ho nasaun hetan tan medalla bronze rua, iha loron-segunda ne'e, iha boxe.
Joven atleta, ne'ebé foin maka halo tinan 22, hetan bronze iha kategoria hosi -57 kilo, emosiona durante serimónia entrega medalla nian, ne'ebé ikusmai nia deklara hanesan "orgullozu" ba konkista.
Antes lakon iha meia-final ba atleta hosi Kamboja, Alisa Chhoueng, atleta timoroan halakon tiha atleta hosi Myanmar, Narry Kaung, ho 34-32 iha kuartu-final hosi kategoria.
Garantia ona medalla bronze rua seluk, ba boxista José Barreto Quintas da Silva ho Frederico Soares Sarmento, ne'ebé sei entrega iha loron-segunda ne'e hafoin final sira hosi sira nia kategoria.
Quintas da Silva hetan bronze hafoin lakon semifinal ho tailandés Anmarti Yaodam, iha kategoria hosi pezu-moska (kilo 52) bainhira Sarmento hetan bronze hafoin kombate ho vietnamita Hoang Dinh Truong, iha pezu-pezadu (kilo 81).
Konkista hosi medalla sira selebra maka'as tebes iha Timor-Leste no mós iha Filipina, ne'ebé dezde inísiu hosi kompetisaun maka populasaun lokal apoia atleta timoroan sira ne'ebé destakadu, úniku sira ne'ebé maka to'o loron-domingu la manán medalla ida.
Atleta na'in 60 resin maka halo parte iha ekipa Timor-Leste nian ne'ebé partisipa iha edisaun ba dala 30 hosi Jogu Sudeste Aziátiku nian, kompetisaun ne'ebé maka ema timoroan sira partisipa ba dala sia.
Delegasaun timoroan sei kompete iha modalidade sira arte marsial nian, atletizmu, boxe ho siklizmu. Futebol, halterofilizmu, karaté, natasaun, taekwondo, ténis-meza, tiru ho voleibol hanesan modalidade sira seluk.
Timor-Leste akumula ona, iha partisipasaun daualuk dahuluk, medalla osan-mean tolu, osan-mutin lima ho bronze hamutuk 21.
Tabela hosi medalla sira hosi edisaun ne'e lidera hosi anfitriaun sira, ho osan-mean hamutuk 112, osan-mutin hamutuk 86 no bronze hamutuk 88.
Fonte: Ajénsia Lusa