Barcelona halo majia no Benfica hatete adeus ba Champions
Kalan nakonu ho golu iha loron-kuarta ne'e hosi Champions League.
FC Barcelona tama iha loron-kuarta ne'e ba kuartu-final Champions League futebol nian, bainhira hatama golu 6-1 hasoru Paris Saint-Germain, rekupera hosi lakon ne'ebé hetan iha jogu dahuluk iha "oitavu" ho 4-0.
Iha Camp Nou, FC Barcelona sai hanesan ekipa dahuluk iha istória ne'ebé rekupera hosi desvantajen 4-0 iha jogu dahuluk, tanba golu sira hosi Luis Suárez, iha minutu tolu, hosi Lionel Messi, hosi penalidade (minutu 50), hosi Neymar (iha minutu 88 ho 90+1) no hosi Sergi Roberto (minutu 90+5), ne'ebé tau hamutuk ho autogolu hosi fransés Layvin Kurzawa (minutu 40). Edinson Cavani marka golu onra ba fransés sira iha minutu 62.
Ho golu marka iha minutu hitu ikus jogu ba dala rua nian, katalaun sira konkretiza ona "mehi" no tau ona "karimbu" hodi liu ba kuartu-final hosi Champions League.
Iha jogu seluk kalan nian, Benfica sai hosi Champions League futebol nian, lakon iha Alemaña ho Borussia Dortmund ho 4-0, iha jogu daruak hosi oitavu-final prova nian.
Hafoin manán tiha iha jogu dahuluk ho 1-0, Benfica haree sedu ekipa jermániku halakon desvantajen, bainhira Aubameyang loke markador iha kedas minutu haat, rezultadu ida ne'ebé mantén to'o intervalu.
Hahú parte daruak, Borussia "taka" eliminatóriu, ho golu sira ne'ebé akontese iha minutu rua nia laran, ida hosi Pulisic (minutu 59) no hafoin ne'e golu ida tan hosi Aubameyang (minutu 61), ne'ebé nia tenta fali iha minutu 85.
@SAPO Desporto