Saltar para: Post [1], Pesquisa e Arquivos [2]

SAPO Desportu TL

Qui | 06.06.19

Buffon husik Paris Saint-Germain hafoin tinan ida to'o iha Fransa

SAPO TL

Paris Saint-Germain (PSG) anunsia iha loron-kuarta saída hosi guarda-rede Gianluigi Buffon, liutiha tinan ida hafoin italianu sai hosi Juventus hodi to'o iha klube futebol fransés ne'e.

buffon_tl2019.jpg

"Ohin loron hotu ona ha'u nia aventura iha estranjeiru. Obrigadu ba ema tomak ba buat hotu hodi halo ha'u iha ona oportunidade hodi hetan esperiénsia iha Paris. Obrigadu ba emosaun sira ne'ebé ita fahe hamutuk", hatete hosi atleta ho tinan 41 ne'e.

 

Internasional dala 176 hamutuk ho Itália, rekord ida iha ‘squadra azzurra’, guarda-rede disputa ona jogu hamutuk 25 iha kompetisaun tomak iha époka ne'e, no sai ona kampeaun fransés ho konkista Supertasa, refere ba tinan 2018.

 

Haktuir hosi site PSG nian, Buffon rekorda katak to'o iha klube "nakonu ho entuziasmu ho simu hosi kalor estraordináriu hosi adeptu sira", ne'ebé hanesan simu "emosionante" ida.

"Obrigadu, hosi ha'u nia fuan laran. Ha'u fila ho ksolok tanba apresia esperiénsia ne'e ne'ebé laiha dúvida ajuda ona ha'u dezenvolve", nia hatutan.

 

PSG revela ona "honra hodi iha guarda-rede koñesidu ida iha istória futebol nian", hodi rekorda nia títulu mundial ho Itália iha tinan 2006 no prémiu individual barak ne'ebé 'Gigi' hetan.

"Ha'u sei la haluha orgullu ne'ebé ema tomak iha PSG senti ona - iha klube no iha adeptu sira - bainhira haree Gianluigi Buffon hatais ami nia kamizola. Iha tempu ne'ebé iha ne'e, nia lori nia esperiénsia fenomenal no nia profisionalizmu, la'ós de'it ho kolega sira maibé mós iha área tomak", klube nia na'in, Nasser Al-Khelaifi, fó elojiu.

 

Hafoin tinan lima iha Parma, Buffon to'o iha Juventus iha tinan 2001, konta ho títulu kampeaun italianu dala sia no tasa transalpinu ho ‘vecchia signora’ dala lima.

 

Foti Tasa UEFA ida no konsideradu ona hanesan guarda-rede di'ak ida hosi UEFA iha 2003 no 2017, maibé nunka manán Champions League ida maski sai dalabarak hanesan finalista.

Iha serbisu ho selesaun, nia estreia iha fulan-Outubru tinan 1997, sai kampeaun mundial iha tinan 2006, sai finalista ne'ebé lakon iha Euro2012 no medalla bronze iha Tasa Konfederasaun nian.

 

Buffon sai mós hanesan jogador daruak ho jogu barak liu iha série A italianu, ho jogu hamutuk 471, hafoin Paolo Maldini ne'ebé iha jogu hamutuk 647.

 

Fonte: Ajénsia Lusa