CR7 maka desportista ne'ebé ema selu di'ak liu iha mundu iha 2016
Jogadór portugés hetan lukru besik euro millaun 82.
AFP Photo@ Michael Buholzer
Futebolista portugés Cristiano Ronaldo, ne'ebé reprezenta Real Madrid, iha tinan 2016 sai hanesan desportista ne'ebé hetan liu osan iha mundu, hetan lukru dolar millaun 88 (besik euro millaun 82), fó sai hosi revista Forbes.
Tuir publikasaun, iha tinan ne'ebé konkista ona Champions League ho emblema españól no Europeu ho Portugal, Ronaldo simu ona dolar millaun 56 iha saláriu no dolar millaun 32 iha patrosíniu sira.
Tuir portugés ne'e maka arjentinu Lionel Messi, futebolista hosi FC Barcelona ho dolar millaun 81,4 no jogador basket norte-amerikanu Lebron James, hosi Cleveland Cavaliers, ho dolar millaun 77,2.
Tenista suisu Roger Federer, ho dolar millaun 67,8, no mós jogador basket norte-amerikanu Kevin Durant, hosi Golden State Warriors, ho millaun 56,2 mosu iha fatin dahaat no dalima.
Ronaldo sai hanesan atleta ho saláriu aas liu, Federer maka sai desportista ne'ebé simu liu osan hosi patrosíniu sira ho dolar millaun 60.
Tenista Serena Williams ho Maria Sharapova sai hanesan feto na'in rua ne'ebé maka halo parte iha lista hosi atleta na'in 100 ne'ebé simu osan di'ak iha tinan liubá, sira na'in rua tama iha pozisaun 40 no pozisaun 88. Serena Williams manán dolar millaun 28,9 no tenista rusa iha osan millaun 21,9.
Jogador golf Jordan Spieth, ho tinan 23, hanesan atleta joven liu ne'ebé maka tama iha lista, okupa pozisaun dasia ho total dolar millaun 52,8, bainhira "papel" desportista "katuas" liu maka kaer hosi jogador golf norte-amerikanu Phil Mickelson, ho tinan 46, tama iha pozisaun daualu ho osan dolar millaun 52,9.
Iha "kampeonatu" hosi empreza desportivu sira, Gestifute, hosi portugés Jorge Mendes, ne'ebé reprezenta Ronaldo ho José Mourinho, no sira seluk, mosu iha fatin daualu ho osan dolar millaun 72,7 ne'ebé maka hetan hosi lukru iha komisaun sira.
Empreza norte-amerikanu Creative Artists Agency iha pozisaun dahuluk ho osan dolar millaun 290,6.
@SAPO Desporto