Cristiano Ronaldo nomeadu ba prémiu 'The Best' hosi FIFA
Internasional portugés Cristiano Ronaldo halo parte iha lista hosi nomeadu na'in 10 ba prémiu 'The Best', ne'ebé FIFA sei hili futebolista di'ak liu hosi époka 2018/2019 no ne'ebé maka avansadu ne'e konkista ona dala lima.
Iha nia temporada dahuluk iha Juventus, jogador portugés ho tinan 34 konkista ona kampeonatu italianu ho Supertasa italianu. Ho Portugal, Ronaldo foti ona troféu hosi edisaun dahuluk hosi Liga Nasaun sira nian.
Aleinde hanesan úniku portugés iha lista, eleitu ba jogador di'ak liu iha mundu iha tinan 2008, 2013, 2015, 2016 ho 2016/2017, destaka mós prezensa hosi internasional arjentinu Lionel Messi, ne'ebé konkista mós dala lima (2009, 2010, 2011, 2012 ho 2014), iha lista ida ne'ebé kroata Luka Modric, vensedor hosi temporada ikus, la halo parte.
Halo parte iha lista maka ejípsiu Mohamed Salah, senegalés Sadio Mané ho holandês Virgil van Dijk, ne'ebé ajuda ona Liverpool konkista Champions League, no mós holandés sira Frenkie de Jong ho Matthijs de Ligt, hosi Ajax.
Fransés Kylian Mbappé (Paris-Saint-Germain), belga Eden Hazard (Chelsea, agora iha Real Madrid) ho inglés Harry Kane (Tottenham) kompleta grupu hosi noemadu sira.
Portugés Bernardo Silva, hosi Manchester City, la tama iha lista final hosi nomeadu na'in 10, ne'ebé laiha jogador ida hosi ‘citizens’, klube ne'ebé maka konkista ona títulu tomak iha Inglaterra (kampeonatu, Tasa Inglaterra nian ho Tasa Liga nian).
Vensedor sira hosi prémiu sira ‘The Best’ sei fó sai iha loron 23 Setembru iha Milaun.
Fonte: Ajénsia Lusa