Saltar para: Post [1], Comentar [2], Pesquisa e Arquivos [3]

SAPO Desportu TL

Ter | 10.07.18

Cristiano Ronaldo sei joga iha Juventus

SAPO TL

Futebolista portugués Cristiano Ronaldo sei joga iha Juventus, hafoin temporada sia iha Real Madrid, fó sai hosi klube españól, iha loron-tersa ne'e, liuhosi komunikadu. 

ronaldo_juventus2018.jpg

"Real Madrid komunika katak, hodi atende ba vontade no pedidu ne'ebé maka hatudu hosi jogador Cristiano Ronaldo, konkorda ona nia transferénsia ba Juventus", hakerek iha komunikadu hosi madridista sira, lahó detalle kona-ba folin ne'ebé maka envolve iha tranzasaun.

Ho tinan 33, kapitaun hosi selesaun portugeza sei defende klube dahaat iha nia kareira senior, hafoin Sporting (2002/03), Manchester United (2003/04 to'o 2008/09) ho Real Madrid (2009/10 to'o 2017/18).

Manán Bola Osan-Mean dala lima, iha tinan 2008, 2013, 2014, 2016 ho 2017, Cristiano Ronaldo iha ligasaun kontratual to'o loron 30 Juñu 2021 ho emblema "merengue", ne'ebé hamutuk nia konkista ona Champions League haat, Tasa Rei rua mo Supertasa hosi España rua.

Juventus domina historial hosi kampeonatu italianu, ho títulu kampeaun hamutuk 34, títulu hitu konkista lahó interupsaun dezde tinan 2011/12 - títulu haat ikus iha komando hosi treinador atual, Massimiliano Allegri.

Ronaldo sei sai hanesan portugés dahitu ne'ebé maka joga iha klube Turim nian, hafoin Rui Barros, Paulo Sousa, Dimas, Jorge Andrade, Tiago ho João Cancelo, ne'ebé kontratadu defeza ne'e hosi Valénsia.

Fonte: Ajénsia Lusa

Comentar:

Mais

Se preenchido, o e-mail é usado apenas para notificação de respostas.