Del Bosque hatete katak demisaun Lopetegui nian la afeta selesaun española iha Mundial2018
Tékniku Vicente Del Bosque, eis-selesionador futebol hosi España no eis-treinador Real Madrid nian, konsidera, iha loron-kinta ne'e, katak demisaun hosi Julen Lopetegui, loron rua antes jogu inaugural hosi Mundial2018, ho Portugal, "sei la afeta ekipa".
"Ha'u imajina katak jogador sira, maski iha kariñu ne'ebé maka sira iha ba treinador anterior [Julen Lopetegui] sira sei fó buat tomak, tanba labele ho dalan seluk, no sei iha asaun ho profisionalizmu maka'as iha Mundial", refere hosi Vicente Del Bosque.
Tuir treinador ne'ebé lori España hetan títulu Mundial (iha tinan 2010) ho títulu Europeu (iha tinan 2012) situasaun ne'e hanesan "la konfortável" ba Real Federasaun Española Futebol nian (RFEF), maibé nia entende katak prezidente Luis Rubiales "fó ona esplikasaun sufisiente sira".
Vicente Del Bosque, tinan 67, dezeja mós ba Julen Lopetegui, ne'ebé troka nia iha selesaun española no ne'ebé sei orienta Real Madrid, no ba Fernando Hierro, responsável ba ‘roja’ iha Mundial2018, "susesu maka'as iha sira nia funsaun foun sira".
Hatán kona-ba karik nia ko'alia ho ema ruma hosi RFEF hafoin demisaun hosi Julen Lopetegui, Vicente Del Bosque hatete la'e, maibé nia dezeja ona ba selesionador demitidu, "ne'ebé halo ona tinan rua fantástiku ho selesaun", "buat di'ak hotu ba nia futuru".
Del Bosque fiar katak Fernando Hierro, ne'ebé kaer derepente selesaun [iha loron rua antes hahú Mundial2018, ho Portugal], sei halo serbisu di'ak ida no nia hatutan ona katak nia la hanoin atu sai hanesan alternativu.
Julen Lopetegui sai hosi selesionador españól futebol nian loron ida hafoin anunsia tiha nu'udar treinador Real Madrid nian, ba temporada tolu oinmai, iha prosesu ida ne'ebé RFEF konsidera hanesan la halo parte no konfronta ho desizaun hosi transferénsia minutu lima antes anúnsiu.
Fonte: Agência Lusa