Deteta ona tranzasaun suspeita 120 resin
Tranzasaun sira relasiona ba atribuisaun Mundiál 2018 no 2022.
Foto: FABRICE COFFRINI / AFP
Komisun responsável ba investigasaun hosi atribuisaun Mundiál futeból 2018 ba Rúsia, no Katar, iha 2022, fó horisehik katak deteta ona tranzasaun finanseira suspeita 120 resin relasiona ho eskolla FIFA nian.
Porta-vóz ida hosi Gabinete Prokuradór-Jerál iha Suíça (OAG), ne’ebé sita hosi ajénsia France Presse, refere katak komisaun simu ona hosi serbisu finanseira investigasaun, relatóriu kona-ba tranzasaun suspeitu hamutuk 120 relasiona ho adjudikasaun ba Mundiál hothotu.
"Relatóriu ne’e relasiona ho prosesu penál ba atribuisaun hosi organizasaun kampeonatu futeból Mundiál 2018 no 2022", refere porta-vóz ne’e.
Komité ezekutivu FIFA diside ona iha dezembru tinan 2010, hodi hili fatin ba realizasaun futeból Mundiál 2018 no 2022, desizaun sira ne’e polémika tebes, tanba deskunfia mosu korupsaun, maibé ne’e nega hosi Rúsia nomós Katar.
Mohamed Bin Hammam, eis-vise-prezidente FIFA no prezidente Konfederasaun Aziátiku ba Futeból, hanesan figura sentrál ida ne’ebé hetan alegasaun barak iha prosesu ne’e.
Bin Hammam ne’ebé komisaun sira hakarak atu kolabora iha investigasaun , sai hanesan figura sentrál hodi indika Mundiál iha Katar, ba tinan 2022, hetan espulsu hosi FIFA iha 2012 hafoin nia naran tama iha prosesu subornu ne’e.
SAPO TL ho SAPO Desportu