Saltar para: Post [1], Pesquisa e Arquivos [2]

SAPO Desportu TL

Qua | 22.01.20

Duodésimu iha Timor-Leste halo susar ba organizasaun Jogu sira CPLP nian

SAPO TL

Xumbu hosi Orsamentu Jeral Estadu (OJE) ba tinan 2020 hamosu hela implikasaun sériu sira iha preparativu sira ba Jogu sira CPLP nian ne'ebé previstu ba fulan-Jullu iha nasaun, hatete hosi sekretáriu Estadu Juventude ho Desportu timoroan nian ba Lusa.

nelio_isaac_noticiatl.jpg

"Xumbu hosi OJE iha parlamentu iha implikasaun sira iha preparativu sira hosi Jogu sira CPLP [Komunidade hosi Nasaun sira Lian Portugeza] nian tanba ami presiza fundu sira ba lojístika no ekipamentu hodi utiliza iha realizasaun hosi jogu sira", hatete hosi Nélio Isaac iha deklarasaun sira ba Lusa iha Díli.

 

Governu hanoin ona dolar millaun 2,25 iha OJE ba tinan ne'e hodi hala'o jogu sira, ne'ebé envolve simu ema besik rihun ida resin, entre atleta sira ho delegasaun sira, hosi Estadu-membru sira hosi Komunidade Nasaun sira Lian Portugeza nian, ne'ebé sei tau hamutuk ho ema timoroan sira hamutuk na'in 850 resin.

Maski preparativu tékniku sira ho infraestrutura sira - inklui kestaun sira hanesan akomodasaun, kondisaun hospitalar sira ho seguransa - hala'o hela, sei presiza fundu sira ba preparasaun tomak.

 

"Estadu tenki foti desizaun polítika ida lalais. Ami presiza apoiu ho finansiamentu hodi hahú prepara ekipamentu ho asuntu lojístiku sira hodi kria kondisaun sira ne'ebé presiza ba jogu sira", nia refere.

 

Nélio Isaac rekorda katak akollimentu hosi jogu sira hanesan kompromisu ida hosi Estadu timoroan ne'ebé "hakarak ka la'e" sei kumpri, maibé falta desizaun sira kona-ba fundu sira ne'ebé presiza.

Previzaun maka atu delegasaun ida hosi komisaun akompañamentu hosi jogu sira sei vizita Timor-Leste iha semana oinmai, iha previzaun ba lansamentu hosi sekretariadu hosi jogu sira ho anúnsiu sira kona-ba konferénsia hosi ministru sira Desportu CPLP nian.

 

Edisaun ba tinan hosi Jogu sira, ba dala 12, sei iha modalidade ualu - inklui atletizmu, futebol, xadrez, karaté, taekwondo, vólei tasi-ibun nian ho ténis - ho Timor-Leste sei partisipa iha modalidade sira hotu.

"Federasaun ida-idak agora prepara hela sira nia atleta", nia esplika.

 

Hanesan iha konseitu ba Jogu sira Luzofonia nian, Jogu sira CPLP nian hanesan eventu multidesportivu ida ba atleta sira ne'ebé seidauk halo tinan 17.

Eventu - ne'ebé foin lalais akontese tinan rua dala ida - hakarak reforsa solidariedade entre sidadaun sira hosi nasaun sira Komunidade nian no promove espíritu fair-play nian.

 

Edisaun ikus akontese iha Jullu 2018 iha São Tomé & Prínsipe, no ida dahuluk akontese iha Setembru 1992 iha Lisboa.

Portugal hanesan selesaun ida ne'ebé hetan liu medalla iha edisaun neen hosi edisaun 11 hosi prova, ne'ebé hahú iha tinan 1992 iha Lisboa no iha tinan ne'e ho vizita ba Timor-Leste jogu ne'e liu ona hosi Estadu-membru sira CPLP nian, la konta ho Guiné Ekuatorial.

 

Brazil sai hanesan ne'ebé hetan liu medalla iha edisaun haat hosi prova no Angola iha edisaun ida.

Fonte: Ajénsia Lusa