Eventu SportImpact halibur labarik atus lima resin iha Lospalos
Atu selebra “Desportu ba Moris”, Iha loron-Sábado, 29 agostu, SportImpact organiza eventu multi-desportu ida iha Kampo Futebol Lospalos
Labarik no joven 500 resin, no adultu sanulu resin, bele koko gratuitamente desportu 14 ne’ebé lahanesan: atletizmu, badminton, basebol, basketból, ténis de praia, boxe, damas, futeból, jinástija, jogu tradisionál sira, ténis meza, taekwondo, voleiból no zumba.
Iha eventu ne’ebé hala’o ona atividade desportiva barak ho rekursu materiál adapatadu. Ko-organizadór sira ne’ebé hetan inspirasaun hosi Manual de Desporto Adaptado konsege ultrapasa difikuldade ne’ebé mosu tanba falta ekipamentu, hodi adapta materiál lokál ne’ebé prodús hikas fali hosi lixu, liu liu iha badminton, basebol, ténis de praia, voleiból, damas, futeból, jogu peaun, ténis meza no disiplina lima hosi atletizmu: haksoit, barreira, estafeta, halai no lansamentu.
Hatudu katak ho boa-vontade, kolaborasaun no determinasaun buat hotu bele halo, eventu ne’ebé organiza hamutu ho organizasaun lokál oioin: Sentru Rejionál Juventude Oekusse, Konsellu Nasionál Juventude Timor-Leste, Asosiasaun Taekwondo, boxe, basketból noVoleiból Lospalos, no profesór oioin hosi Edukasaun Fízika Eskola Nino Konis Santana Lospalos.
SportImpact, iha Sentru Juventude Oekusse, organiza mós kursu ho durasaun loron haat kona-ba “Guia ba Organizasaun Eventus Desportivus”, ne’ebé partisipa hosi reprezentante lokál 33 hosi Sentru Rejionál Juventude Oecusse, Konsellu Nasionál Juventude Timor-Leste, Asosiasaun Taekwondo no Voleibol Lospalos, no seluk tan. Partisipante iha kursu ne’e sira ko-organiza eventu iha loron-sábadu liuba, hodi pratika fali saida maka sira aprende iha workshop no oinsá planea hodi replika eventu iha tempu oin mai.
Tuir SportImpact, organizasaun sira hanesan UNESCO no World Vision Timor-Leste hatudu interese boot hodi apoia SportImpact iha fulan balun iha tinan 2015. Tanba ne’e, futuru kontinuasaun projetu maka ladauk iha serteza tanba falta apoiu finanseiru ba 2016, maski orsamentu uitoan.
Iha tinan 2016 SportImpact hakarak replika inisiativa “Desportu ba Moris” ba nível postu administrativu sira (sub-munisípiu) hosi Timor-Leste no buka parseiru no apoiu finanseiru ne’ebé bele viabiliza projetu.
SportImpact agradese liuliu ba apoiu hosi MOVE- Universidade Católica Portuguesa liuhosi voluntáriu na’in-haat iha part-time, AICEP Portugal Global – Ajénsia ba Investimentu Komérsiu Esternu Portugal, liuhosi estajiáriu ida, Peace and Sport hodi kria no fahe Manual Desportu Adaptadu no ba One World Play Project, ne’ebé oferese bola futeból ‘indestrutível’ liuhosi ChildFund. Ba eventu ne’e SportImpact agradese apoiu ema hotu nian ko-organizadór no voluntáriu sira.
Kona-ba eventu “Desportu ba Moris”
Eventu “Desportu ba Moris” maka hanesan ko-organizadu hosi SportImpact hamutuk ho grupu barak no organizasaun lokál sira, hodi fó oportunidade ba komunidade atu koko desportu oioin iha fatin ida de’it (baibain hala’o iha fatin kampu futeból nian ka estádiu ne’ebé disponível). SportImpact konvida eskola hotu-hotu hosi rejiaun atu lori sira ninia labarik no joven sira. Objetivu maka atu hatudu katak la presiza halo infraestrutura boot ida hodi realiza eventu no insentiva grupu no asosiasaun lokál sira organiza mesak ho inisiativa ne’ebé hanesan iha futuru.
Eventu ne’e mós inklui elementu edukasaun no saúde. To’o agora: kombate ba tabaku iha resintu no halo promosaun hosi komportamentu sira ne’ebé iha relasaun ba foer. SportImpact buka parseiru sira ne’ebé bele tau matan ba eventu sira hanesan kanál di’ak ida no atu hariku ho sira ninia konteúdu rasik.
Iha fulan sira oin mai, SportImpact sei lori projetu ida ne’e ba munisípiu tolu ne’ebé planea tiha ona no agradese apoiu hosi UNESCO ne’ebé sei lori mós projetu ba fatin 4 seluk, bele kompleta país ne’e tomak:
· Lospalos: workshop 24-28/ Ago, eventu 29/Ago
· Maliana: workshop 07-10/Set, eventu 11/Set
· Baucau: workshop 15-18/Set, eventu 19/Set
· Aileu: workshop 28/Sep-02/Out, eventu 03/Out
· Suai: workshop 12-16/Out, eventu 17/ Out
· Viqueque: workshop 26-30/Out, eventu 31/ Out
· Ainaro: workshop 16-20 Nov, eventu 21/Nov
· Same: workshop 30/Nov-04/Dez, eventu 05/Dez
Kona-ba SportImpact
SportImpact hanesan negósiu sosiál ho misaun atu promove dezenvolvimentu umanu liuhosi desportu. Fundadór maka espesialista sira iha jestaun desportu, empreendedorizmu sosiál no jestaun konflitu, ho esperiénsia internasionál oioin atu dezenvolve desportu iha país sira hanesan Timor-Leste, Afeganistaun, Brazíl, Portugál no Singapura.
Atu haten liutan informasaun: Sportimpact | www.facebook.com/sportimpact.org
Kontatu: events@sportimpact.org, Tel. (+670) 7801 4000