FBI halo investigasaun ba Blatter
Tuir BBC, Blatter hatene kona-bá subornu ho folin euro millaun 92 ne'ebé selu ba membru antigu sira hosi organizmu ne'e.
Autoridade norte-amerikanu sira investiga indísiu sira ne'ebé hatudu katak prezidente FIFA nian, Joseph Blatter, ne'ebé agora daudaun hetan suspensu, hatene kona-bá subornu ho folin besik dolár millaun 100 ne'ebé selu ba membru antigu sira hosi organizmu ne'e, fó sai hosi BBC.
Tuir investigasaun hosi BBC, ne'ebé fó sai iha loron-domingu, empreza hosi "marketing" desportivu ISL karik selu osan ho totál dolár millaun 100 ba membru sira hosi organizmu máximo hosi futeból mundiál nian, inklui ba eis-prezidente FIFA nian João Havelange no ba antigu ezekutivu Ricardo Teixeira, ne'ebé hodi hetan troka ba direitu televizivu sira no hosi "marketing" durante tinan 1990.
Blatter garanti nafatin katak nia la hatene kona-bá pagamentu sira, maibé emisora adianta katak iha asesu ba karta ida ne'ebé FBI hetan katak iha dúvida kona-bá nia negasaun ne'e.
Karta ne'e refere ba pagamentu sira hosi ISL no karik hakerek hosi Havelange, ne'ebé nota katak Blatter iha "koñesimentu maka'as hosi atividade sira ne'e" no nia "simu nafatin informasaun" hosi sira.
Blatter sai hanesan "númeru daruak" hosi Havelange antes kaer nia fatin nu'udar prezidente FIFA nian iha tinan 1998. Tuir emisora BBC, Blatter lakohi hatán ba nia alegasaun sira.
Blatter, ne'ebé hetan suspensu iha fulan-Outubru ba loron 90 hosi komité étika FIFA nian, tenki husik nia kargu iha fulan-Fevereiru oinmai.
Aleinde investigasaun hosi parte Estadus Unidus ne'e, Blatter mós hetan investigasaun kriminál hosi Suisa tanba suspeitu liuliu ba jestaun ne'ebé ladi'ak iha organizmu máximo futeból mundiál nian no ba pagamentu dolár millaun rua, ne'ebé halo iha 2011, ba nia eventuál susesór, prezidente ne'ebé suspensu hosi UEFA, Michel Platini.
Investigasaun suisu halo organizmu hosi étika FIFA nian lansa inkéritu ida iha futuru.
Investigadór sira hosi FIFA hakotu ona nia investigasaun iha fulan-Novembru, entrega ona prova sira ba juís hosi komisaun étika nian, ne'ebé sei fó sai verediktu iha fulan ne'e.
Platini implikadu iha investigasaun hanesan, investigadór sira sei espalla iha instánsia futebolístiku sira, seidauk hatene kastigu ne'ebé husu hasoru Blatter.
Antigu internasionál fransés, ho tinan 60, hetan suspensu hosi atividade tomak ne'ebé iha ligasaun ho futeból to'o loron 05 Janeiru 2016 no nia prosesu kandidatura ba prezidénsia FIFA nian, ne'ebé nia eleisaun halo iha 26 Fevereiru, hetan mós suspensu.
FIFA sai abaladu hosi eskándalu ida korupsaun nian iha fulan-Maiu, loron rua liutiha hafoin reeleisaun hosi Joseph Blatter nian nu'udar prezidente hosi organizmu máximo futeból mundiál nian, iha prosesu ida ne'ebé loke hosi justisa Estadus Unidus nian no halo ona akuzasaun ba dirijente no eis-dirijente sira na'in 14.
Iha semana liubá, Departamentu Justisa norte-amerikanu nian fó sai ezisténsia hosi akuzadu foun na'in 16 relasionadu ho eskándalu korupsaun nian, na'in ualu admiti ona sira nia implikasaun iha kazu.
@SAPO Desporto