Gianni Infantino maka prezidente foun FIFA nian
Sekretáriu-jerál UEFA maka troka Joseph Blatter.
Gianni Infantino maka manán eleisaun sira hosi FIFA no troka Joseph Blatter iha prezidénsia hosi organizmu ne'ebé kaer futeból mundiál, ho mandatu válidu to'o tinan 2019.
Kandidatu italo-suisu ne'e hetan votu 115 no halakon konkorénsia hosi sheikh Salman Al Khalifa (votu 88), hosi prínsipe jordanu Ali bin al Hussein (4) no hosi fransés Jérôme Champagne (0), konsege nune'e preferénsia hosi maioria federasaun hamutuk 207 ne'ebé maka bele vota.
Prezidente foun FIFA nia naran hetan de'it iha volta daruak, hasoru rezultadu hosi ronda dahuluk ne'ebé akontese iha kongresu hosi organizmu nian iha Zurike. Kandidatu na'in tolu tama iha turnu daruak: Gianni Infantino, sekretáriu-jerál hosi UEFA,ne'ebé hetan votu 88, Salman Al Khalifa, prezidente Konfederasaun Aziátiku nian ne'ebé hetan votu 85 no prínsipe Ali Bin Al-Hussein, visi-prezidente FIFA nian ne'ebé hetan votu 27. Fransés Jerome Champagne, eis-sekretáriu-jerál adjuntu FIFA nian, hetan de'it votu hitu no lakon tiha. Antes, Tokyo Sexwale dezisti tiha hosi kandidatura.
Hodi hametin eleisaun ba ronda dahuluk kandidatu ida tenki rejista maioria hosi votu 2/3 votu sira. Maibé tanba laiha, tenki halo volta daruak ne'ebé maka maioria simples (ho votu 104) to'o ona hodi determina prezidente foun.
Kongresu estraordináriu FIFA nian hala'o tiha ona iha loron-sesta ne'e iha Zurike (Suisa).
@SAPO Desporto