"Ha’u servisu maka’as hodi manan prémiu ne’e"
Cristiano Ronaldo foin maka manan prémiu ba Jogadór Di’ak iha Europa.
Cristiano Ronaldo
Cristiano Ronaldo horisehik manan ona prémiu ba Jogadór Di’ak iha Europa. Jogadór hosi ekipa Real Madrid nian ne’e halakon Arjen Robben no Manuel Neuer, hanesan jogadór rua hosi Bayern de Munique ne’ebé mós sai hanesan kandidatu ba trófeu ne’e.
“Ha’u halo servisu maka’as hodi manan troféu ne’e. Ha’u sente haksolok. Ha’u tenke fó obrigadu ba ha’u-nia ekipa, tanba la ho sira ha’u sei labele manan prémiu refere. Ha’u mós hakarak fó obrigadu ba ha’u-nia família no ba ha’u-nia amigo sira. Ho serteza katak ha’u-nia maun sei tau trófeu refere iha Muzeu, Madeira nian. Obrigadu ba jornalista hothotu ne’ebé fó ona votu ba ha’u”, dehan Cristiano Ronaldo hafoin simu tiha prémiu hosi Platini.
Ida ne’e hanesan vez dahuluk ba Cristiano Ronaldo simu prémiu ba Jogadór Di’ak iha Europa. Eleisaun ne’e hala’o hosi jornalista hothotu iha Europa, hafoin hala’o sorteiu hosi faze grupu Liga dos Campeões.