Herrera: "Van Gaal nunka atu rende"
Jogadór españól hato’o defeza ba tékniku olandés, ne’ebé despede hosi diresaun Manchester United.
Foto: Lusa
Médiu españól Ander Herrera sai hanesan jogadór ida ne’ebé kontratadu liuhosi treinadór Louis van Gaal. Hafoin liu loron hirak treinadór olandés sai hosi komando tékniku Red Devils, hodi husik fatin ba José Mourinho, Herrera hato’o ninia defeza ba van Gaal.
“Laós tempu konfortável, maibé hanesan profissionál no ami lapermite kualkér distrasaun ruma. No bele hatete katak treinadór ne’e mantein forte nafatin, nia nunka hatudu sinál hakarak rende. Ikus mai, ami konkista Taça Inglaterra”, hatete jogadór tinan 26 ne’e, iha deklarasaun ba jornál Marca.
“Van Gaal ema ida ne’ebé onestu, tau Manchester United liu buat hotu no bele halo servisu ida di’ak. Karik ha’u hakfodak ? Ohin loron, laiha buat ruma halo ha’u hakfodak iha futeból. Manchester tenki luta ba títulu hotu no bainhira lakon iha luta saída ba treinadór hanesan senáriu ida possível”, nia hatutan.
SAPO TL ho SAPO Desportu