José Mourinho rekoñese katak Manchester United sei iha susar hodi luta ba títulu
Treinador portugés José Mourinho rekoñese iha loron-kuarta ne'e katak Manchester United sei laiha potensial sufisiente hodi halo parte entre favoritu sira hodi manán liga ingleza futebol nian.
"Realidade dahuluk ne'ebé maka tenki aseita maka ami nia nível la hanesan ho plantel sira hosi ekipa sira hanesan Liverpool no Chelsea. Ami presiza kontratasaun balun no mantén ami nia estrela sira bainhira ami hakarak luta ba títulu", hatete hosi tékniku, iha konferénsia imprensa hosi lansamentu ba nia estreia iha International Champions Cup.
José Mourinho konsidera katak falta iha grupu jogador na'in rua ho kualidade ne'ebé permiti hodi fila fali ba luta hodi hetan títulu: "Ha'u hakarak iha tan jogador na'in rua maibé buat ida maka ha'u nia hakarak, parte seluk maka saida maka sei akontese".
Tékniku portugés hatudu nafatin deskonfortu balun, tanba, to'o agora, Manchester United halo de'it akizisaun tolu, Fred, Diogo Dalot, eis-Fc Porto, no guarda-rede Lee Grant, bainhira rival sira hanesan Liverpool gasta osan maka'as hodi hamenus diferensa sira ba kampeun ne'ebé kaer hela títulu, Manchester City.
United hanesan klasifikadu daruak iha temporada liubá, maibé dook ho pontu 19 hosi City, ne'ebé halo Mourinho hakarak investe maka'as iha ekipa antes taka merkadu ne'ebé iha tinan ne'e taka sedu tebes iha Inglatera (iha 09 Agostu).
Treinador portugés hatudu mós preokupasaun tanba, agora daudaun, labele konta ho jogador titular na'in sia ba estájiu ne'ebé sei halo iha Estadus Unidus, tanba sira kumpri hela períudu férias nian hafoin partisipa tiha iha Mundial2018 iha Rúsia.
Fonte: Ajénsia Lusa