Juventus iha finál Liga Kampeaun ho FC Barcelona
Ohin Juventus kualifika aan ba finál Liga Kampeaun futeból, bainhira empata 1-1 iha Real Madrid nia kampo, iha jogu segunda mão hosi meias-finais, no sei ba diskuti títulu ho FC Barcelona.
Hafoin lakon primeira mão, iha Turim, 2-1, ekipa española, ne’ebé sai hanesan detentora hosi títulu, hetan vantajen iha eliminatória iha Santiago Bernabéu, iha Madrid, liuhosi penalidade boot ida ne’ebé transforma hosi Cristiano Ronaldo, iha minutu 23, maibé eis-'merengue' Morata, ne’ebé marka ona golu ida hosi 'Juve' iha primeiru jogu, konsege halo empata, iha minutu 57.
Ba dala rua sai kampeaun europeia, iha 1985 no 1996, Juventus sei hakat ba iha jogu ida ne’ebé desizivu ba dala ualu ninian, fila ba finál kompetisaun europeia prinsipál hafoin liu tiha tinan 12 hosi prezensa ikus. Iha loron 06 Juñu, estádiu Olímpico de Munique sei sai hanesan fatin hosi finál inédita, entre trikampeaun italianu no españól sira hosi FC Barcelona, ne’ebé elimina Bayern Munique, ho vitória 3-0 iha nia uma no lakon iha 3-2 iha Alemaña.
SAPO TL ho Lusa