Kolómbia ho Xina prepara akordu iha futebol
Kolómbia ho Xina bele hakotu akordu ida koperasaun nian iha futebol, ne'ebé sei inklui sosa partisipasaun sira iha ekipa kolombianu sira nian, liuhosi empreza xineza sira, hatete hosi visi-prezidente hosi Federasaun Kolombianu nian, iha deklarasaun sira ba ajénsia españól EFE.
Jorge Fernando PErdomo hasoru malu, iha loron-kinta, ho Cai Zhenhua, Prezidente hosi superliga xineza, prova máxima hosi futebol nian iha Xina, ne'ebé halo parte hosi enkontru oioin ne'ebé sei halo to'o loron-sábadu.
Komitiva kolombianu, ne'ebé inklui ekipa hitu hosi ekipa prinsipal hosi nasaun, hasoru malu mós ho visi-prezidente hosi Asosiasaun Xineza Futebol nian, Lin Xiaohua, no ho ekipa hamutuk 12 hosi divizaun dahuluk xineza nian. Reuniaun sira hakarak hetan akordu sira iha área sira investimentu nian, kompetisaun ho formasaun.
"Hanesan semana ida importante tebes ba futebol kolombianu no ami hein katak sei hanesan mós ba futebol xinés", Perdomo hatete no haktuir hosi ajénsia EFE.
Entidade kolombianu sira konvida ona empreza xineza sira hodi investe iha klube sira hosi nasaun ne'e. "Hanesan faktu ida katak kapital estranjeiru benvindu nafatin iha futebol profisional kolombianu nian", hatete hosi visi-prezidente hosi Federasaun Kolombianu Futebol nian.
Iha mós proposta atu empreza xineza sira patrosina ekipa sira hosi kampeonatu kolombianu.
Perdomo fó hanoin katak iha empreza xineza hamutuk 21 maka halo operasaun iha Kolómbia, ne'ebé bele haree futebol hanesan dalan ida hodi dezenvolve iha nasaun.
Reprezentante kolombianu sira konsidera mós katak, bainhira selesaun hosi nasaun ne'e kualifika ba mundial iha Rúsia, iha 2018, parte hosi preparasaun nian sei halo iha Xina, no atu ekipa xineza sira halo nia pré-temporada iha Kolómbia.
Federasaun kolombianu konvida mós treinador xinés sira hodi estuda iha Universidade Futebol nian iha Kolómbia.
Perdomo felisita serbisu hosi jogadór na'in 11 hosi Kolómbia ne'ebé maka halo parte iha klube xinés sira, konsidera sira hanesan embaixadór di'ak hosi nasaun.
Antigu jogador sira hosi FC Porto Jackson Martínez ho Fredy Guarín hanesan futebolista kolombianu na'in rua ne'ebé maka kompete iha Xina.
ho Lusa