Lionel Messi manán Bola Osamean ba dala lima
Jogadór arjentinu manán iha konkorrénsia ho Neymar no Cristiano Ronaldo.
Foto: Fabrice Coffrini/AFP
Arjentinu Lionel Messi iha segunda-feira ne’e manán Bola Osamean hosi FIFA, prémiu ne’ebé fó ba jogadór dia’k liu iha tinan 2015. Avansadu ho tinan 28 hosi Barcelona manán iha konkorrénsia ho brazileiru Neymar no portugés Cristiano Ronaldo no konkista prémiu ne’e ba dala lima ona iha nia karreira.
Avansadu hosi Barcelona ne’e hetan 41,33% hosi votu sira. Cristiano Ronaldo mak segundu, ho 27,76%, no Neymar mak terseiru, ho 7,86 %.
Messi konkista ona troféu iha tinan 2009, 2010, 2011 no 2012. Iha segunda-feira ne’e, no hafoin tinan rua Cristiano Ronaldo mak konkista troféu, jogadór arjentinu ne’e mak manán fali.
Iha tinan 2015, Lionel Messi konkista 'triplete' hosi Barça - Liga, Taça do Rei no Liga dos Campeões – no simu tan Supertaça Europeia no Mundial de Clubes, ida ikus ne’e bainhira taka votasaun ba Bola Osamean. Hanesan mós vice-campeão hosi Copa América, hosi Arjentina. Tuir termu individuál, nia aponta golu 52 no fó asisténsia 26 iha jogu 61.
SAPO TL ho SAPO Desportu