Lopetegui: "Sei susar halo ekipa ida ne'ebé lahó Ronaldo"
Treinador Real Madrid nian afirma mós katak Gareth Bale sei iha nível ne'ebé di'ak tebes iha temporada ne'e.
Treinador Real Madrid nian, Julen Lopetegui, rekoñese ona iha loron-segunda ne'e katak Cristiano Ronaldo hanesan jogador ida ne'ebé importante liu hosi istória "merengue sira nian" no asumi ona katak hanesan dezafiu boot ida hodi harii ekipa ida lahó portugés ne'e.
"Presiza rekoñese katak nia hanesan jogador ida importante liu iha istória hosi Real Madrid nian. Klube valoriza ona nia heransa hodi fasilita nia saída. Ami senti konvensidu katak Bale sei iha tinan di'ak ida no ami hein rezultadu hosi nia. Ami sei serbisu hodi nia aprezenta nia versaun", Lopetegui hatete iha konferénsia imprensa.
"Bainhira ha'u asina, Cristiano Ronaldo sei pertense ba klube maibé nia hafoin ne'e hatudu vontade hodi sai. Nu'udar treinador sei hanesan dezafiu apaixonante ida hodi halo ekipa kompetitivu ida lahó Ronaldo", nia hatutan.
Treinador hatete mós katak reforsu úniku sira ne'ebé maka hein hanesan jogador sira ne'ebé partisipa ona iha Mundial: "Ami hein reforsu di'ak tebes hamutuk na'in neen: Sergio Ramos, Varane, Modric, Kovacic... ami satisfeitu ho plantel ne'ebé ami iha no senti konvensidu katak ami sei luta ba objetivu sira, iha Real Madrid tenki hanesan ne'e".
Fonte: Ajénsia Lusa