Lopetegui sei treina Sevilha iha temporada tolu oinmai
Españól Julen Lopetegui, antigu treinador FC Porto nian, sei komanda Sevilha iha temporada tolu oinmai, anunsia hosi klube ho pozisaun daneen iha Liga española futebol nian.
Antigu guarda-rede, ho tinan 52, sei treina fali, hafoin hahú tiha iha temporada liubá iha Real Madrid, ne'ebé nia asumi komando hafoin saída derepente hosi selesaun española antes hahú Mundial2018.
Tuir klube andaluz, ne'ebé iha prezensa hosi portugés Daniel Carriço, Lopetegui, ne'ebé uluk iha FC Porto iha époka sira 2014/15 ho 2015/16, to'o iha loron-tersa ne'e iha Sevilha no sei aprezenta iha loron-kuarta.
Lopetegui nia kareira treinador hahú iha 2003/04 iha Rayo Vallecano, iha momentu ne'ebá halo parte iha eskalaun daruak España nian, tuir ekipa B Real Madrid nian no eskalaun sira hosi formasaun selesaun española nian, ho konkista sira hosi títulu europeu sira hosi sub-19 iha 2012 no sub-21 iha 2013.
Hafoin esperiénsia portugeza, tékniku fila ba selesaun prinsipal España nian, hodi troka Vicente del Bosque, hodi konsege kualifikasaun ba Mundial2018, la lakon jogu ida, maibé hafoin ne'e troka tiha iha loron rua antes hahú kompetisaun, hafoin fó sai nia akordu ho Real Madrid.
Lopetegui husik tiha "merengue sira" iha Outubru 2018 hafoin lakon ho 5-1 bainhira vizita FC Barcelona, bainhira Real Madrid okupa, iha momentu ne'ebá, fatin dasia iha klasifikasaun, pontu hitu hosi katalaun sira.
Fonte: Ajénsia Lusa