Lutador Conor McGregor anunsia final kareira iha MMA
Lutador irlandés Conor McGregor, antigu kampeaun kmaan no pluma hosi Ultimate Fight Championship (UFC), anunsia ona iha loron-tersa katak sei husik arte marsial mistu sira (MMA), maibé la hatete kona-ba motivu sira saída nian.
"Anúnsiu lalais ida. Ha'u desidi sai hosi desportu, ne'ebé koñese ho naran formal hanesan arte marsial mistu sira. Ha'u dezeja felisidade ba ha'u nia kompañeiru antigu sira ne'ebé sei tuir iha kompetisaun. Agora, ha'u sei hamutuk ho lutador sira ne'ebé iha ona aventura hosi reforma", atleta hakerek iha mensajen ida ne'ebé publika iha rede sosial sira.
Anúnsiu ne'e mosu liutiha oras balun hafoin McGregor admiti ona katak halo hela negosiasaun hodi tenta fila ba kompetisaun iha fulan-Jullu.
McGregor, ho tinan 30, ne'ebé koñesidu ho naran popular hanesan ‘The Notorious’, hanesan lutador ida famozu tebes hosi MMA, maibé la manán dezde fulan-Novembru 2016, bainhira halakon Eddie Alvarez no sai hanesan membru dahuluk hosi UFC ne'ebé maka hetan sinturaun rua, iha tempu hanesan, hosi kategoria ne'ebé la hanesan.
Iha tinan tuirmai, irlandés lakon kombate úniku ne'ebé nia halo hasoru pujilista norte-amerikanu Floyd Mayweather, antes fila ba dala ikus ba UFC, iha fulan-Outubru 2018, hafoin parajen ida durante tinan rua, ne'ebé hafoin ne'e nia lakon ho rusu Khabib Nurmagomedov.
Hafoin kombate, McGregor envolve iha konfrontu sira ho komitivu hosi adversáriu, ne'ebé halo suspensaun ida hosi kompetisaun durante fulan neen no multa ida dolar 50.000 (euro 44.000 resin).
Koñesidu ho hahalok ne'ebé dalabarak hanesan susar bainhira laiha kombate, atleta ne'e prezu iha fulan ne'e iha Miami, iha estadu norte-amerikanu Florida nian, tanba, deskonfia, naok no estraga telemóvel hosi adeptu ida ne'ebé maka hakarak hasai nia fotografia.
Fonte: Ajénsia Lusa