Marcello Lippi asumi fali kargu ba selesionadu futebol Xina nian
Treinador italianu Marcello Lippi sei kaer fali selesaun xineza, liutiha fulan haat hafoin husik tiha kargu, hodi kualifika nasaun ba Mundial2022, anunsia hosi Federasaun Xineza Futebol nian (CFA) iha loron-sesta ne'e.
"Bainhira Lippi kaer ekipa nasional antes, jogador sira hatudu ona atitude pozitivu ida ho espíritu kombativu ida", indika hosi komunikadu ne'ebé fó sai hosi CFA.
Marcelo Lippi, tinan 71, husik tiha kargu selesionador Xina nian iha fulan-Janeiru, hafoin eliminasaun ho 3-0 hasoru Iraun, iha momentu ne'ebá treinadu hosi portugés Carlos Queiroz, iha kuartu-final hosi Tasa Aziátiku.
"Ho Lippi, ami fiar katak ekipa maskulinu xineza sei hasoru buat hotu hodi hetan mehi hosi kualifikasaun ida ba Mundial2022", ne'ebé sei halo iha Qatar, hatutan hosi federasaun.
Treinador, ne'ebé iha tinan 1996 lori Juventus ba títulu europeu, substitui ona hosi kompatriota Fabio Cannavaro iha selesaun xineza, ne'ebé orienta ona jogu rua iha Marsu, akumula kargu ho tékniku hosi Guanghzou Evergrande.
Fonte: Ajénsia Lusa