Massimiliano Allegri hatete katak Cristiano Ronaldo hanesan "jogador ida ho nível oinseluk"
Treinador Juventus nian, Massimiliano Allegri, afirma iha loron-kuarta katak Cristiano Ronaldo hanesan jogador ida "ho nível oinseluk", hafoin internasional portugés marka tiha hasoru Ajax (1-1) iha kuartu-final hosi Champions League futebol nian.
"Cristiano Ronaldo hanesan nível ida oinseluk", Allegri hatete bainhira refere ba golu kabesa nian ne'ebé maka avansadu halo bainhira loke markador iha Amsterdaun, iha minutu 45, ho sekuénsia hosi kruzamentu ida hosi jogador luzu seluk, lateral João Cancelo, iha jogu dahuluk hosi "kuartu".
Ronaldo, ne'ebé halo ona marka dalima iha edisaun prezente hosi prova ne'e, sai importante ba apuramentu ida hosi ‘biaconeri’ sira ba kuartu-final, bainhira marka golu tolu vitória nian hasoru Atlético de Madrid (3-0), hodi anula vantajen ne'ebé maka españól sira konkista iha jogu dahuluk hosi "oitavu" (2-0).
Juventus hetan empate iha kedas parte daruak, iha minutu 46, bainhira brazileiru David Neres aproveita ona Cancelo nia sala no tama to'o área italianu, antes hasoru ho guarda-rede Szczesny.
"Hanesan xoke ida, maibé ami rekupera lalais [hosi golu empate nian]. Ha'u lansa ona jogador sira ne'ebé tékniku liu [Dybala ho Douglas Costa], hodi ami iha liu kontrolu ba bola", Allegri refere hodi destaka mós forma oinsá Ajax konsege ona halo susar Juventus.
Enkontru hosi jogu daruak hosi "kuartu" marka ona ba loron-tersa oinmai iha Turim.
Fonte: Ajénsia Lusa