Mate ona eis-prezidente UEFA Lennart Johansson
Sueku Lennart Johansson, antigu prezidente UEFA nian entre tinan 1990 ho 2007, mate ona iha loron-kuarta ne'e ho tinan 89, anunsia hosi Federasaun sueka futebol nian.
Iha komunikadu, federasaun indika katak Lennart Johansson, eis-prezidente UEFA (Uniaun hosi Asosiasaun Europeia sira Futebol nian) no eis-visi-prezidente FIFA nian (Federasaun Internasional Futebol nian), mate ona iha loron-kuarta ne'e ho tinan 89 hafoin "moras badak ida".
"Futebol sueku lutu hela. Lennart Johansson mate ona. Ami nia pensamentu ba família no ba ema sira ne'ebé besik nia", refere hosi federasaun.
Iha nota, prezidente hosi federasaun sueka, Karl-Erik Nilsson salienta katak Johansson hanesan ona "líder internasional importante liu hosi futebol sueku".
Lennart Johansson, moris iha Bromma (Estokolmo) iha tinan 1929, hahú nia kareira nu'udar funsionáriu AIK nian, iha sesaun ‘bandy’, hanesan hókei ida iha jelu maibé ho baliza ho kampu boot liu, ikusmai muda ba futebol no ne'ebé maka nia halo parte durante dékada tolu nia laran.
Johansson sai ona nu'udar prezidente hosi Asosiasaun hosi Klube Profisional Sueku sira (1984-1991) no lidera ona Federasaun Sueku Futebol nian (1985-1990), ne'ebé maka nia asede ba lideransa hosi futebol europeu ho mundial.
Durante tempu ne'ebé maka nia iha komando UEFA nian, Johansson mantén konflitu ida ho suisu Sepp Blatter.
Hafoin lakon eleisaun sira hodi eleitu fali nu'udar prezidente UEFA nian iha tinan 2007 kontra fransés Michel Platini, nia fila fali ba Suésia hodi konsentra ba dala uluk iha promosaun hosi "bandy", desportu ne'ebé maka nia hahú ona nia kareira.
Fonte: Ajénsia Lusa