Saltar para: Post [1], Pesquisa e Arquivos [2]

SAPO Desportu TL

Seg | 27.01.20

Michael Jordan lamenta mate hosi "alin ki'ik" Kobe Bryant

SAPO TL

Antigu jogador hosi Liga norte-amerikanu basket nian (NBA) Michael Jordan lamenta ona iha loron-domingu mate hosi nia "alin ki'ik liu" Kobe Bryant, hodi refere katak hanesan "kompetidor maka'as" ida no aman ida ne'ebé "fantástiku".

kobe2.jpg

Norte-amerikanu Kobe Bryant, tinan 41, konsidera hanesan jogador di'ak tebes hosi NBA, mate iha loron-domingu tanba asidente ida helikópteru nian iha Calabasas, ne'ebé iha mós vítima na'in ualu seluk, entre sira maka nia oan-feto Gianna ho tinan 13.

 

Jogador basket ne'e, koñesidu ho naran "Black Mamba" (kobra mamba metan), to'o iha NBA ho tinan 17 no joga ona durante tinan 20 iha Los Angeles Lakers, no konkista ona títulu lima hosi NBA no medalla osan-mean olímpiku rua (Pekin2008 ho Londres2012). Hanesan atleta ida hosi atleta na'in hitu úniku ne'ebé maka ultrapasa ona marka hosi pontu 30.000 iha kareira.

"Ha'u iha xoke ho notísia trájiku sira hosi Kobe no Gianna nia mate. Liafuan sira labele deskreve moras ne'ebé ha'u senti. Ha'u hadomi Kobe, hanesan alin ida ne'ebé ki'ik liu ba ha'u", refere hosi Michael Jordan iha komunikadu.

 

Jordan, antigu estrela hosi Chicago Bulls no ba ema barak hanesan jogador di'ak liu hosi NBA, afirma ona katak ko'alia baibain ho Kobe Bryant, hosi hatete katak sei sente falta ba momentu sira ne'e.

"Nia uluk hanesan kompetidor maka'as ida, ida ne'ebé maka di'ak liu iha jogu no forsa kriativu ida. Kobe uluk hanesan mós aman fantástiku ida ne'ebé hadomi nia família no iha orgullu tebes iha nia oan-feto nia domin ba basket", nia hatutan.

 

'Air Jordan', ne'ebé maka konkista ona títulu neen iha NBA, haruka mós nia kondolénsia sira ba Kobe Bryant nia família, ba LA Lakers ho ba adeptu tomak basket nian.

 

Futebolista portugés Cristiano Ronaldo hamutuk mós ba ema millaun resin ne'ebé maka publika ona mensajen sira kondolénsia nian kona-ba antigu jogador basket ne'e nia mate.

"Ha'u senti triste tebes tanba rona notísia devastador sira kona-ba Kobe no nia oan-feto Gianna nia mate. Kobe hanesan lenda loloos ida no inspirasaun ida ba ema barak. Ha'u haruka kondolénsia ba nia família no ba família hosi ema sira ne'ebé maka lakon ona vida iha asidente", nia hatete iha mensajen ida iha rede sosial Instagram.

 

Futebolista arjentinu Lionel Messi mós hatudu, liuhosi rede sosial hanesan, nia sentimentu sira ba família.

"Ha'u laiha liafuan... Ha'u nia domin tomak ba Kobe nia família no belun sira. Hanesan ksolok ida hodi koñese ó no fahe momentu di'ak sira hamutuk. Lakon ona matenek ida", nia hakerek.

 

Iha Abril 2016, Kobe joga nia jogu ikus hosi NBA, ne'ebé marka ona pontu hamutuk 60 hasoru Utah Jazz, no sai ona hanesan jogador katuas liu ne'ebé maka hetan pelumenus pontu 50 iha jogu ida iha NBA.

 

Fonte: Ajénsia Lusa