Mourinho nia planu traidor hodi "na'ok" Messi hosi Barcelona
Messi bele simu euro millaun 100 bainhira lakohi renova ho Barcelona no millaun 50 resin tinan-tinan iha Manchester United.
Imajina tiha ona Messi hetan treinu hosi José Mourinho iha Manchester United? Hanesan vizaun ida ne'ebé hamosu mehi-aat ba ´afficion` hosi Barcelona maibé halo mehi ba adeptu sira hosi "red devils" nian. Haree Messi treinu hosi Mourinho hanesan hanoin ida ne'ebé ikus ne'e hetan kredibilidade. Planu hanesan boot no hatama Adidas iha klaran.
Tuir hakerek hosi jornal katalaun ´Sport`, ne'ebé haktuir publikasaun ida hosi ´Marketing Deportivo` katak José Mourinho iha planu traidor ida hodi hasai Messi hosi Barcelona, ho ajuda hosi Adidas. Klube inglés no marka boot alemaun sei tenta konvense jogador arjentinu hodi muda ba Old Traford, hodi tulun klube to'o iha títulu sira no fó poténsia ba marka Manchester United nian, ne'ebé la manán buat importante ida iha tinan hirak ne'e nia laran.
Ideia maka Messi asina hahú hosi époka tuirmai, husik Barcelona ho folin zero, iha fulan-Juñu 2018. Marka alemaun halo ona investimentu maka'as tebes iha Manchester United, ho folin euro millaun 100 tinan-tinan ba tinan sanulu oinmai, maibé entende agora katak tenki estabelese dotasaun klube hosi jogador sira ne'ebé bele lori ba títulu nasional sira no internasional sira. Multinasional alemaun, patrosinadór Messi nian, hakarak tau hamutuk nia jogador prinsipal ba klube ne'ebé investe maka'as liu.
Iha tempu asinatura kontratu nian entre Adidas ho Manchester United, marka alemaun "proteje aan" ho kláuzula ida "ta'uk" nian: diminuisaun hosi 30% iha folin hodi selu tinan-tinan ba United, bainhira klube la kualifika ba Champions League. Ka, bainhira la tama iha Champions, hanesan akontese iha époka ne'e, United simu de'it euro millaun 65 hosi Adidas.
´Marketing Deportivo` fó hanoin katak "renovasaun daualuk Messi nian seidauk hahú, seidauk halo negosiasaun no laiha proposta ruma iha meza leten".
Messi nia kontratasaun la akontese de'it tanba kláuzula milionáriu hosi resisaun arjentinu nian: euro millaun 250. Nune'e, dalan ida hodi muda kláuzula ne'e maka selu euro millaun 100 ba Messi hodi la hanaruk nia vínkulu ho blaugrana, ne'ebé hotu iha fulan-Juñu 2018. Folin ne'e sei hanesan prémiu ida asinatura nian ba jogador arjentinu ne'ebé sei simu euro millaun 50 brutu tinan-tinan iha Manchester United.
Maski hosi númeru sira ne'e hotu, bele "halo lanu" jogador ruma, iha pormenor importante ida: Messi nia vontade hodi husik Barcelona, klube ne'ebé forma nia. Iha Catalunha, Messi hanesan ídolu ida, nune'e sei susar husik blaugrana sira tanba de'it kestaun finanseiru nian.
@SAPO Desporto