Mukilina Soares sai kampeaun mundiál iha Kumite
Mukilina Soares sai kampeaun mundu husi karate Kimura Shukokai Internationál ho kategoria kumite (kombate), iha kampeonatu mundiál modalidade ne’ebé hala’o entre loron 20 no 25 Jullu 2014, iha Sun City, África do Sul, haktuir ba AMAMOTIL, AsosiasaunMosambikanu nian no Belun sira husi Mosambike iha Timor-Leste.
Foto de Mukilina Soares gentilmente cedida por AMAMOTIL
Feto ne’e nia aman timoroan no inan mosambikanu maka sai pratikante no instrutora karaté, Mukilina dehan nia kontente tebes ho vitória ida ne’e.
“Vitória ida ne’e importante tebes mai ha’u. Besik tinan sanulu halo karreira iha karaté. Kuaze buat hotu ha’u manán ona no só hela de’it títulu ida ne’e iha ha’u nia kurríkulu", dehan Mukilina Soares.
Kampeaun mundiál kumite ne’e dehan katak "rekoñese mós tanba serbisu maka’as, dedikasaun, sakrifísiu no entrega aan tomak ba desportu. Hafoin hetan tiha buat hotu ne’ebé ladi’ak iha tinan ida ne’e, bainhira ha’u-nia-inan mate no ha’u-nia prima, ida ne’e sai hanesan ksolok bot liu mai ha’u ne’ebé hetan, to’o agora!", haktuir AMAMOTIL
Nia mós dedika títulu ida ne’e ba delegasaun no atleta sira hotu.
"Títulu ida ne’e la’ós ha’u nian de’it, maibé husi delegasaun tomak no husi atleta sira ne’ebé kompete iha mundiál ida ne’e, tanba ne’e se laiha unidade, entrega no dedikasaun husi ema hotu, sei sai susar atu manán títulu ne’e", dehan Mukilina.
SAPO TL