Mundial2018: Pelé fiar iha Brazil no iha rekuperasaun Neymar nian
Brazileiru Pelé, antigu estrela futebol mundial nian, hatudu "konfiante" ba Mundial2018, iha Rúsia, no fiar katak Neymar sei di'ak ba kompetisaun, ne'ebé "kanariñu sira" buka títulu mundial ba dala neen.
Iha deklarasaun sira ba ajénsia AFP, antigu avansadu hosi Santos afirma katak Brazil iha hipóteze di'ak sira, maibé katak, maski iha ekipa di'ak ida, futebol hanesan desportu ida ne'ebé iha surpreza no la'ós de'it ekipa sira ne'ebé di'ak tebes maka bele manán.
"Loos duni katak ha'u hakarak atu Brazil sai kampeaun mundu nian, maibé futebol hanesan kaixa ida surpreza nian. Ami iha jogador di'ak sira iha Europa no sei hanesan dezafiu ida haree sira joga hamutuk, maibé ha'u hanoin katak ami iha ekipa di'ak ida ba mundial ne'e", Pelé hatete durante vizita ida ba Dubai.
Kona-ba lezaun Neymar nian, ne'ebé opera ona iha fulan-Marsu ba metatarsu dalima iha ain loos, Pelé fiar iha nia rekuperasaun total tanba, tuir nia rasik, lezaun "la'ós hanesan todan tebes".
"Neymar hanesan jogador ida importante tebes ba Brazil, laiha dúvida. Ami la hatene loloos saida maka sei akontese, maibé ha'u hanoin katak nia sei di'ak hodi joga iha Mundial no ha'u dezeja ba nia sorte ne'ebé ha'u iha iha kampeonatu sira mundu nian", nia hakotu.
Pelé, tinan 77, hanesan jogador úniku ne'ebé maka manán mundial tolu (1958, 1962, 1970), marka golu hamutuk 77 iha jogu hamutuk 92 ho kamizola brazileiru.
Brazil, ne'ebé konkista nia títulu mundial ikus iha kompetisaun ne'ebé organiza hamutuk hosi Japaun ho Koreia-Súl, iha 2002, halo parte iha grupu E Mundial nian, ne'ebé sei halo entre loron 14 Juñu to'o 15 Jullu, no sei hasoru Suisa, Sérvia ho Kosta Rika.
Fonte: Agência Lusa