Muzeu FIFA nian loke iha loron 28 Fevereiru iha Zurike
Muzeu FIFA nian instala iha edifísiu ida iha sentru Zurike nian, okupa área ida ho 3.000 metru kuadradu ho andar tolu, no hatudu istória hosi futeból mundiál, liuhosi sasán, livru sira no fatin interativu sira.
Muzeu hosi Federasaun Internasionál Futeból nian (FIFA), ne'ebé investe ona osan euro millaun 128 resin, sei inaugura iha loron 28 Fevereiru iha Zurique, loron rua hafoin eleisaun ba prezidente foun, haktuir hosi organizmu iha loron-kuarta ne'e.
Inaugurasuan ba muzeu ne'e mosu iha momentu konturbadu hosi FIFA nia istória, tanba eskándalu no prosesu judisiál sira ne'ebé akontese daudaun, ne'ebé hadook dirijente oioin, entre sira maka prezidente hosi organizmu, suisu Josep Blatter.
"Ami la hatene karik prezidente foun sei asisti inaugurasaun", refere ona hosi diretór muzeu nian, Stefan Jost, hodi hatutan katak "sekretáriu-jerál interinu Markus Kattner sei marka prezensa".
Ideia ba muzeu ida hosi FIFA lansa hosi Joseph Blatter, ne'ebé suspensu ba tinan ualu iha loron 21 Dezembru liubá hosi atividade tomak relasionadu ho futeból, hafoin halo pagamentu euro millaun 1,8 ba prezidente UEFA nian, Michel Platini.
Inaugurasaun hosi muzeu sei halo iha 28 Fevereiru iha Zurike, iha Suisa, loron rua hafoin eleisaun ba susesór Joseph Blatter nian, entre lote sira hosi kandidatu ne'ebé inklui Ali Al Hussei (Jordánia), Salman Bin Ebrahim al Khlalifa (Bahrein), Jérôme Champagne (Fransa), Gianni Infantino (Suísa) ho Tokyo Sexwalle (Áfrika-Súl).
"Ami labele ignora tumultu ne'ebé akontese iha FIFA, maibé ne'e la'ós hanesan muzeu ida dedikadu ba personalidade sira maibé dedika ba futeból iha mundu tomak", Stefan Jost hatete no hatutan katak kolesaun hahú de'it ho pesa rua no hafoin ne'e maka mosu doasaun oioin.
Troféu orijinál ida hosi Mundiál ida no kamizola ida hosi selesaun Itália nian nu'udar kampeaun mundiál tinan 1938 maka hanesan objetu sira impulsionadór iha muzeu, aleinde sasán emprestadu sira no balun hetan iha leilaun sira.
@SAPO Desporto