Organizador sira Tour de Timor iha tusan dolar rihun 210 resin ba empreza ho atleta sira
Empreza timoroan sira ne'ebé apoia ona atleta nasional ho internasional sira ne'ebé partisipa ona iha edisaun tinan liubá hosi Tour de Timor to'o ohin loron seidauk simu hosi organizador sira hosi eventu, konfirma ona hosi kredor sira ba Lusa.
Tusan sira, ne'ebé ultrapasa ona dolar rihun 200 (euro rihun 177), halo parte mós Suai Extreme, eventu ne'ebé Tour de Timor organiza hosi empreza Noble Timor.
Empreza ho atleta oioin ne'ebé maka ko'alia ho Lusa konfirma ona katak seidauk simu osan ruma ne'ebé sira debe no afirma ona katak laiha resposta ba pedidu sira esplikasaun nian, hodi akuza proprietáriu hosi empreza, Sean Borrell, sai ona hosi nasaun lahó rezolve problema.
Bainhira kontakta hosi Lusa, responsável hosi Noble Timor husu ona pergunta eskritu, ne'ebé hafoin ne'e lakohi hatán.
"Tanba tentativa oioin hosi Noble Timor hodi rezolve dezafiu finanseiru sira hosi eventu internasional rua ne'ebé halo iha 2018, proprietáriu ho diretor hosi operasaun Nobel Timor, Sean Borrell, agora daudaun laiha disponibilidade hodi komenta kona-ba kestaun sira ne'e", refere hosi deklarasaun ne'ebé nia rasik haruka ba Lusa.
Kredor sira asina ona petisaun ida ne'ebé haruka ona ba Prezidente Repúblika, ba prezidente Parlamentu Nasional no ba primeiru-ministru, no ba ema sira seluk ne'ebé inklui detalle sira hosi empreza, ida-idak, sira hamutuk 16 ne'ebé tenki iha entre dolar atus lima no dolar rihun 26.
Material publisitáriu sira no hosi promosaun inklui vídeo oioin hosi sekretáriu Estadu ba Juventude ho Desportu (SEJD), Nélio Isaac, ho eis-Prezidente na'in rua, José Ramos-Horta, no iha kazu Tour de Timor nian, ho Xanana Gusmão, iha kazu hosi Suai Extreme ne'ebé fó nia apoiu.
Material tomak hosi eventu rua inklui logo sira hosi Ministériu ho entidade públiku oioin maibé Nélio Isaac garanti ona katak apoiu ne'ebé fó ba eventu sira "hanesan de'it apoiu moral".
"Kestaun ne'e hanesan de'it responsabilidade hosi Noble Timor. Ami nia parte hanesan Governu maka fó de'it apoiu moral", nia hatete hodi esplika katak apoiu inklui karta sira hodi tenta apoiu sira hosi patrosinador sira.
Fonte hosi petrolíferu Timor Gap konfirma ona ba Lusa katak empreza apoia ona Tour de Timor ho dolar rihun 50, "husu ona" ba empreza sira seluk hodi apoia mós eventu.
Entre "parseiru" sira ne'ebé tama iha lista iha mós Autoridade Nasional hosi Petróleu ho Mineral no empreza oioin, inklui Timor Telecom, Cardno, AirNorth, Southern Cross, Timor Resources ho Northern Oil & Gás Australia.
Isaac hatete katak Governu hatene problema no iha mós kestaun oioin ba Noble Timor, insisti katak "laiha kontratu ruma" apoiu nian no asisténsia ne'ebé fó maka halo de'it iha área sira saúde ho seguransa hodi apoia atleta sira.
Laiha entidade públiku ida iha orsamentu previstu ida iha 2018, ba Tour de Timor ka ba Suai Extreme, haktuir hosi livru orsamentu sira nian iha tinan liubá.
Iha relatóriu hosi ezekusaun orsamental hosi SEJD iha trimestre tolu dahuluk 2018 nian iha 440110 kona-ba Programa Tour de Timor ho Maratona Díli nian maibé lahó fundu sira.
Tour iha ona edisaun sanulu no konsidera hanesan eventu desportivu internasional importante iha Timor-Leste ho atleta sira hosi nasaun oioin inklui hosi Portugal ho Austrália.
Governu timoroan sai hanesan responsável prinsipal hosi eventu to'o tinan 2016, tinan ne'ebé iha problema oioin, hanesan falta bee ho hahán ba atleta sira.
Sean Borrell ho Noble Timor asumi ona responsável sira iha 2017, ho eventu hala'o "ho kréditu hosi empreza sira", hasoru promesa hosi pagamentu ne'ebé maka halo ona.
"Tinan ne'e, iha fali envolvimentu hosi empreza sira, hosi baze iha promesa katak sei selu. Iha tinan pagamentu nian to'o tarde maibé to'o. Agora la'e", hatete hosi Tino de Freitas, diretor jeral hosi Timor Lodge, hotel ne'ebé sai hanesan "kuarter-jeneral" hosi prova.
Anche Cabral, siklista timoroan ne'ebé koñesidu - kompete ona iha Jogu Olímpiku iha Rio de Janeiro -, konfirma ona ba Lusa katak nia, hanesan mós atleta sira seluk iha lista (tinan ne'e tama iha pozisaun datoluk) la simu prémiu sira.
"Tuir loloos simu dolar 780 maibé ha'u seidauk simu buat ida. Ema ida seidauk simu. Ami nia konta maka atleta sira tenki simu dolar rihun 12", nia hatete.
"Hanesan susar tanba hafoin tempu barak treinu nian, sosa ekipamentu, hafoin ne'e la simu. Ne'e halakon motivasaun hosi siklista nasional sira. Ha'u hein katak ne'e sei rezolve", nia hatete.
David Lyons, siklista australianu ida ne'ebé partisipa ona dala ualu hosi edisaun sanulu no ne'ebé hatete katak "ajuda ona salva tour iha tinan 2013 bainhira Governu kuaze estraga", lamenta situasaun atual no konfirma katak partisipante internasional sira "seidauk simu" sira nia prémiu.
"Ha'u la simu ona resposta ba email sira. Ne'e hanesan estrañu tebes", nia esplika.
Gina Ricardo, siklista australianu ne'ebé manán iha kategoria feminina iha prova, konfirma mós katak la simu dolar 5.000 ne'ebé maka sei debe ba nia iha prémiu sira.
"Loos. Triste tebes tanba ha'u seidauk simu", nia konfirma ona ba Lusa.
David Vaz, portugés ne'ebé manán ona iha kategoria maskulinu hosi prova iha edisaun tolu ikus ne'e, konfirma mós ba Lusa katak seidauk simu prémiu ne'ebé refere ba edisaun 2018 nian.
"Ha'u seidauk simu pagamentu ruma hosi Tour. Ha'u hatene mós katak ema barak seidauk simu", siklista ne'e hatete.
Tino de Freitas admiti katak situasaun afeta empreza oioin ne'ebé apoia ona eventu importante ida hodi halo projesaun ba Timor-Leste, ne'ebé nia imajen "bele hetan estraga tebes".
"Iha futuru, sei hanesan susar hetan apoiu hosi empreza sira ne'e no karik susar halo mobilizasaun hosi atleta sira hodi partisipa", nia hatete.
Noble Timor, ne'ebé tuir nia pájina iha internet katak harii ba "investimentu étiku sira" iha Timor-Leste, tau José Ramos-Horta hanesan nia patronu.
Ramos-Horta garanti ona ba Lusa katak fó de'it "apoiu moral" ba projetu no laiha "ligasaun finanseiru ruma ka responsabilidade finanseiru ka ezekutivu" ho Tour de Timor ne'ebé, tuir nível formal, nia laiha ona "ligasaun durante tinan barak nia laran".
"Ha'u triste, triste tebes ho situasaun ne'ebé sei halakon inisiativu hosi Tour de Timor no laiha ema ida maka sei hakarak atu partisipa", nia lamenta.
"Bainhira ita hakarak promove Timor-Leste, ita tenki halo ho ativizmu maka'as, apoia ho finansiamentu sériu, previzível ho garantidu. Iha tinan sanulu ka tinan 20 oinmai, bainhira área privadu metin ona no ho likidez, Governu bele husik fó apoiu. Maibé agora tenki kontinua", nia hatete.
Fonte: Ajénsia Lusa