Pelé konsidera Messi hanesan "jogadór di’ak liu iha dékada ikus"
Antigu “astro” brazileiru koloka argentinu iha patamár ne’ebé aas liu Cristiano Ronaldo.
Foto: YASUYOSHI CHIBA / AFP
Antigu futebolista brazileiru Pelé afirma horisehik katak argentinu Leo Messi hanesan " jogadór di’ak liu iha dékada ikus", durante konferénsia imprensa iha sidade Calcutá, iha Índia, konvida hosi klube lokál.
“Ema barak kompara Messi ho Ronaldo, maibé sira diferente. Sira-na’in rua fantástiku, maibé Messi mak jogadór di’ak liu iha dékada ikus”, hatete ‘Rei’, ne’ebé konsidera kompatriota Neymar hanesan mós jogadór ida di’ak liu iha mundu.
Durante konferénsia ne’e, Pelé aproveita hodi esklarese katak la iha intensaun ruma atu kandidata ba prezidénsia FIFA nian.
“La’e, ha’u la iha intensaun ruma atu sai prezidente FIFA nian”, afirma brazileiru, ho tinan 74, kampeaun mundiál dala tolu hosi ‘canarinha’.
Pelé hetan konvite hodi asiste primeira partida Atlético de Calcutá iha nia estádiu, nune’e fila ba Índia iha tinan 38 hafoin joga iha ne’ebá ho kamizola Cosmos, ekipa norte-amerikana.
SAPO TL ho SAPO Desportu