Pelé sai ona hosi hospital iha Paris no to'o ona Brazil
Antigu futebolista Pelé to'o, iha loron-tersa ne'e, iha São Paulo, Brazil, hafoin internadu tiha iha hospital ida iha Paris, tanba infesaun urinária maka'as ida.
Antigu glória hosi Santos no hosi selesaun brazileiru bele haree ho kadeira roda bainhira sai hosi aeroportu São Paulo nian, haktuir hosi notísia ne'ebé avansa hosi ajénsia France Presse.
"Dala ida tan buat hotu la'o ho di'ak, grasa Maromak nian. Ha'u moris hela", Pelé hatete ba jornalista sira bainhira sai hosi terminal.
Pelé iha hela Fransa ba eventu ida hosi patrosinador ida, ne'ebé tuir loloos tenki akompaña fransés Kylian Mbappé, maibé, liutiha oras balun hafoin hamutuk ho jogador hosi Paris Saint-Germain, nia sente ladi'ak, isin-manas, kontrasaun muskular no kolen, nune'e maka lori ba hospital ida.
Konsidera ona hosi ema barak nu'udar jogador ida hosi istória futebol nian, Edson Arantes do Nascimento, koñesidu ho naran Pelé, hanesan trikampeaun mundial úniku, ho títulu sira ne'ebé konkista iha tinan 1958, ho de'it tinan 17, iha tinan 1962 ho tinan 1970.
Fonte: Ajénsia Lusa