Real Sociedad manán iha Málaga no sa’e ba fatin dalima
Real Sociedad iha ohin ba Málaga manán ekipa lokál ne’e ho 2-0, iha jogu ba jornada 18.ª futeból Liga española, no sa’e ba fatin dalima, ne’ebé bele hetan asesu ba faze grupu Liga Europa nian.
Golu sira hosi ekipa basca marka iha tempu daruak, dahuluk iha minutu 50 hosi sentrál Inigo Martinez, liuhosi ezekusaun livre ida ne’ebé bola desvia hosi trajetória iha barreira, no golu daruak hosi Juanmi, iha pozisaun klara “fora de jogo”, bainhira simu bola manán iha altura, ho ulun, hosi brazileiru Willian da Silva, hafoin pontapé kantu ida.
Ho vitória ne’e, Real Sociedad sa’e ba fatin dalima, ne’ebé fó asesu ba faze grupu Liga Europa, ho pontu 32, liu Villarreal iha fatin daneen, ho menus pontu ida.
Kampeonatu ne’e lidera hosi Real Madrid, ho pontu 40, liu deit pontu ida duké Sevilha, ne’ebé maka lakon iha domingu ne’e, iha Sanchéz Pizjuán, ho 2-1, hosi sekuénsia reviravolta ida iha finál jogu nian, no liu rua duké FC Barcelona.
SAPO TL ho SAPO Desportu