Ronald Koeman maka selesionador foun futebol Holanda nian
Antigu futebolista Ronald Koeman sei kaer knaar nu'udar selesionador futebol Holanda nian, hodi troka Dick Advocaat, fó sai hosi federasaun holandeza futebol nian iha loron-tersa ne'e.
Iha komunikadu, organizmu refere katak Koeman, ne'ebé orienta ona Benfica iha tinan 2005/2006 no konkista ona Supertasa Cândido de Oliveira, asina ona kontratu ida ho validade ba tinan haat.
Ronald Koeman, tinan 54, sei iha misaun prinsipal maka kualifika Holanda ba Europeu 2020 nian no ba Mundial 2022, hafoin selesaun "laranja" falla prezensa iha Mundial tinan ne'e, ne'ebé maka sei halo iha Rúsia.
Antigu defeza, ne'ebé iha ona internasionalizasaun hamutuk dala 78 ho selesaun holandeza no sai ona kampeaun europeu iha tinan 1988, hahú kareira futebolista iha Groningen, hafoin ne'e liuhosi Ajax, PSV Eindhoven, FC Barcelona (España) ho Feyernoord.
Nu'udar treinador, hahú kareira iha Vitesse, hafoin ne'e sai hanesan adjuntu hosi Louis van Gaal nian iha FC Barcelona, liuhosi Ajax, PSV Eindhoven, Benfica, AZ Alkmaar, Feyenoor, Southampton, ho Everton, klube ne'ebé nia husik iha fulan-Outubru liubá.
Selesaun holandeza, klasifikadu datoluk iha Mundial Brazil nian, iha tinan 2010, falla ona prezensa iha Euro2016, konkista hosi Portugal, no iha Mundial tinan ne'e nian.
Fonte: Lusa