Rui Costa ho Maradona marka ona prezensa iha "jogu ba dame"
Antigu jogadór futebol koñesidu sira hosi mundu tomak marka ona prezensa iha jogu solidariedade ne'e.
AFP Photo
Portugés Rui Costa, arjentinu Diego Maradona, brazileiru Ronaldinho, italianu Francesco Totti no figura sira hosi futebol mundial halibur malu iha loron-kuarta ne'e iha Roma ba "Play of Peace", hodi hatán ba apelu hosi Papa Francisco.
"Ami iha ne'e hodi joga ba dame, ba dame iha Mundu tomak", Maradona hatete antes rona apitu hodi hahú jogu amigável ne'ebé partisipa mós nia kompatriota arjentinu sira Hernán Crespo ho Juan Sebastián Verón, brazileiru Cafú, Frédéric Kanouté, hosi Mali, ka fransés Vincent Candela, no antes ne'e Papa simu tiha ona sira iha Vatikanu.
"Play of Peace" hanesan inisiativu solidariedade ida ne'ebé Papa Francisco harii, no nia osan sira sei haruka ba Scholas Occurentes, rede internasional ida ne'ebé halibur eskola hamutuk 400.000 iha kontinente lima nia laran.
Tinan ne'e, parte balun hosi osan sira ne'ebé hetan hosi jogu, ne'ebé hala'o iha loron-kuarta iha Roma, sei haruka hodi tulun populasaun sira ne'ebé afetadu hosi rai-nakdoko ne'ebé akontese iha Itália iha fulan-Agostu nia rohan.
"Obrigadu ba Papa Francisco, obrigadu ba ema sira ne'ebé mai haree jogu ne'e no Obrigadu ba Itália. Ami sei kontinua joga ba dame", Maradona Promete.
@SAPO Desporto