Saltar para: Post [1], Comentar [2], Pesquisa e Arquivos [3]

SAPO Desportu TL

Qua | 08.01.20

Senegalés Sadio Mané eleitu futebolista afrikanu di'ak liu ba tinan ne'e

SAPO TL

Senegalés Sadio Mané eleitu ona, iha loron-tersa ne'e, nu'udar futebolista afrikanu di'ak liu ba tinan ne'e, halakon ejípsiu Mohamed Salah ho arjelinu Riyad Mahrez iha konkorénsia ba prémiu ne'ebé fó hosi Konfederasaun Afrikanu Futebol (CAF) nian, iha Ejiptu.

Sadio Mané.jpg

Avansadu hosi Liverpool, ho tinan 27, simu ona prémiu ba dala uluk iha kareira, troka duni opozitor na'in rua, Mohamed Salah, ne'ebé hanesan mós jogador hosi "reds" no vensedor iha tinan 2017 ho 2018, no Riyad Mahrez, atleta hosi Manchester City, ne'ebé simu prémiu iha tinan 2016.

 

Sadio Mané konkista ona votu hamutuk 477, ho Salah hetan 325 no Mahrez hetan 267.

Iha tinan 2019, Mané ajuda ona Liverpool hodi konkista Champions League, Supertasa Europeia ho Kampeonatu Mundu ba klube sira, aleinde sai hanesan finalista hosi Tasa Konfederasaun Afrikanu (CAN) sira ho selesaun Senegal nian.

 

"Ha'u senti haksolok no orgullozu tebes tanba manán troféu ne'e. Ha'u hakarak agradese ba ha'u nia família, liuliu ba ha'u nia tiu ne'ebé maka marka prezensa iha ne'e, ba ha'u nia selesaun, ha'u nia selesionador no ba ema tomak iha Liverpool", Mané hatete iha serimónia ne'ebé halo iha Hurghada, iha Ejiptu.

Internasional senegalés, ne'ebé foin lalais ne'e tama iha fatin dahaat iha Bola Osan-Mean nian, hafoin Lionel Messi, Virgil van Dijk ho Cristiano Ronaldo, la haluha "ema senegalés tomak" ne'ebé maka apoia nafatin nia no rekorda perkursu hosi kareira: "Ha'u hahú iha vila ki'ik ida iha Senegal no ha'u to'o dook ona".

 

Sadio Mané, ne'ebé hetan klasifikasaun daruak iha prémiu CAF iha tinan 2017 ho 2018, no iha pozisaun dahuluk iha 2016, hanesan senegalés daruak ne'ebé maka eleitu nu'udar jogador afrikanu di'ak liu, hafoin El-Hadji Diouf hetan prémiu iha tinan 2001 ho 2002.

 

Marokinu Achraf Hakimi, ne'ebé empresta hela hosi Real Madrid ba Borussia Dortmund, konsidera ona nu'udar joven jogador afrikanu di'ak liu, no nijeriana Asisat Oshoala, hosi FC Barcelona, eleitu nu'udar futebolista feto di'ak liu.

 

Prémiu ba treinador di'ak liu entrega ona ba Djamel Belmadi, ne'ebé lori Arjélia hodi manán edisaun ikus hosi CAN.

Prémiu sira vota hosi selesionador sira ka diretor tékniku sira ho 'kapitaun sira' hosi selesaun afrikanu sira ne'ebé halo parte hosi CAF.

 

Fonte: Ajénsia Lusa

Comentar:

Mais

Se preenchido, o e-mail é usado apenas para notificação de respostas.