SportImpact selebra Loron Internasionál Desportu ba Dame no Dezenvolvimentu
SportImpact halibur organizasaun desportiva timoroan hodi selebra Loron Internasionál Desportu ba Dame no Dezenvolvimentu.
Atu selebra Loron Internasionál Desportu ba Dame no Dezenvolvimentu, SportImpact iha loron-sábadu, 28 Marsu, sei organiza eventu desportivu ida iha Estádiu Munisipál Dili, hahú hosi tuku 7:00 to’o tuku 11:30 dadeer.
Iha koordenasaun ho federasaun desportiva timoroan sanulu resin no organizasaun sira seluk, SportImpact sei organiza ventu multi-desportu ida iha ne’ebé labarik, joven no públiku sira bele koko desportu no atividade ho tipu oi-oin, inklui atletismu, badminton, basketeból, futeból, karaté, kempo, silat, taekwondo, ténis, ténis meza, xadrés no zumba.
Objetivu maka promove konvíviu, dame no amizade entre ema ho idade hotu no hosi fatin, no hatudu katak ho vontade-di’ak no espíritu kolaborativu bele implementa inisiativa bo’ot ho rekursu uitoan no kontribui ba dezenvolvimentu Timor-Leste.
Eventu ne’e loke ba públiku, ho konvite espesiál ba eskola sira iha Díli atu iha loron-sábadu lori sira nia estudante sira ba Estádiu Munisipál ba dadeer ksolok desportiva.
Organizasaun ka voluntáriu interesadu sira hodi partisipa bele kontatu ba SportImpact liu hosi kontaktu sira iha kraik ne’e.
Kona-ba Loron Internasionál Desportu ba Dame no Dezenvolvimentu
Asembleia Jerál Nações Unidas deklara loron 6 Abril hanesan Loron Internasionál Desportu ba Dame no Dezenvolvimentu, hodi promove potensiál desportu nian hanesan feramenta hodi kontribui ba objetivu Dame no dezenvolvimentu Nações Unidas nian. Tinan 2015 hanesan tinan daruak hodi selebra loron ne’e.
Kona-ba SportImpact
SportImpact hanesan negósiu sosiál ida ho misaun atu promove dezenvolvimentu umanu liu hosi desportu. Fundadór maka espesialista sira iha jestaun desportu, empreendedorismu sosiál no jestaun konflitu nian, ho esperiénsia internasionál barak hodi dezenvolve desportu iha nasaun hanesan Timor-Leste, Afeganistaun, Brazil, Portugál no Singapura.
Hatene liu tan informasaun iha SportImpact
Kontaktu: events@sportimpact.org, Tel. (+670) 7801 4000
SAPO TL ho SportImpact