TAS fó sai iha loron-sesta desizaun kona-bá rekursu hosi Platini
TAS rona ona iha loron-tersa advogadu sira hosi eis-futebolista internasionál fransés no hosi FIFA nian.
Tribunál Arbitrál hosi Desportu (TAS) fó sai ohin katak sei fó sai iha loron-sesta desizaun kona-bá rekursu ne'ebé aprezenta hosi Michel Platini hosi suspensaun loron 90 ne'ebé Komité Étika FIFA nian fó ba nia.
"TAS karik sei fó sai desizaun iha tuku 10:00 (oras lokál) iha loron-sesta. Desizaun sei fó sai iha "site" ofisiál TAS nian no sei komunika ba imprensa", refere hosi nota ne'ebé fahe iha loron-kinta ne'e hosi organizmu ne'e.
Iha loron 08 Outubru, Michel Platini hetan suspensu ba loron 90 hosi Komité Étika FIFA nian ne'ebé investiga osan ne'ebé nia simu ho folin euro millaun 1,8 iha 2011 hosi Joseph Blatter hodi selu serbisu ida akonsellamentu ne'ebé halo iha 2002.
Platini apela ona ba suspensaun ne'ebé hadook nia hosi prezidénsia UEFA nian no mantén suspensu ba prosesu kandidatura ba eleisaun sira ba prezidénsia FIFA nian ne'ebé marka ona ba loron 26 Janeiru.
TAS rona ona iha loron-tersa advogadu sira hosi eis-futebolista internasionál fransés no hosi FIFA nian.
Aleinde Michel Platini, Komité Étika nia suspende mós iha loron 08 Outubru, tanba implikasaun iha eskándalu korupsaun nian ne'ebé akontese iha instituisaun, Joseph Blatter no sekretáriu-jerál FIFA nian fransés Jérôme Valcke.
@ SAPO Desporto