Tókio ilumina Skytree ho kór sira Brazil nian iha onra ba jogu sira
Iluminasaun sei hanaruk to'o loron 22 Agostu, bainhira hahú siklu olímpiku Tókio2020.
Foto: Franck Robichon / EPA
Tókio ilumina daudaun ho kór bandeira brazileiru nian, verde ho amarelu, hahú hosi loron-kinta, iha edifísiu aas liu iha nasaun, Skytree, hodi selebra inaugurasaun hosi Jogu Olímpiku sira Rio2016, iha loron-sesta.
Skytree sei iha iluminasaun espesial ne'ebé sei muda iha minutu 30 nia laran entre kór bandeira Brazil nian ho kór bandeira Japaun nian, mean ho mutin, hahú hosi loraik to'o kalan fahe rua, durante períudu tomak eventu nian, entre loron 05 no 21 Agostu.
Torre, ho aas metru 643, hanesan símbolu ida hosi kapital japuneza, ne'ebé sei hanesan sede hosi Jogu Olímpiku sira iha tinan 2020.
Skytree sei iha iluminasaun oinseluk bainhira atleta japunés sira manán medalla osan-mean balun iha Rio de Janeiro.
Eventu ne'e hanesan atividade ida ne'ebé sidade rua desidi hala'o hamutuk hodi promove atuál no futuru Jogu Olímpiku sira.
Parseria sira inklui instalasaun hosi ekran ho dimensaun boot iha fatin públiku balun ne'ebé ema frekuenta liu iha Tókio, hodi nune'e ema bele asisti diretu prova sira.
Durante serimónia enseramentu Jogu sira nian, iha estádiu Maracaña, iha loron 21 Agostu, pasajen hosi bandeira olímpiku Rio de Janeiro ba Tókio sei konta ho prezensa hosi governadora foun eleitu Tókio nian, Yuriko Koike, no primeiru-ministru japunés, Shinzo Abe.
Iluminasaun sei hanaruk to'o loron 22 Agostu bainhira sei hahú siklu olímpiku Tókio2020.
@SAPO Desporto