Treinador portugés asina kontratu hodi lidera Selesaun Nasional Futebol Timor-Leste nian
Portugés Fabiano Flora, atual treinador hosi Boavista FC Timor, asina iha loron-segunda ne'e kontratu hodi lidera Selesaun Nasional Futebol Timor-Leste nian, ho objetivu dahuluk prepara jogu sira sudeste aziátiku nian iha final tinan ne'e.
Flora, ne'ebé sei akumula kargu rua to'o temporada nia rohan, hatete katak sei serbisu hodi renova imajen selesaun nian, atua iha "laran no mós iha liur hosi kampu" hodi prepara futuru ho di'ak.
"Hanesan dezafiu boot ida. Antes hosi buat hotu, importante liu, maka hamoos imajen ne'ebé maka iha antes", nia hatete ba Lusa iha Díli.
"Ha'u hakarak kria baze serbisu ida ba agora ho ba futuru, la'ós de'it ho selesaun prinsipal maibé mós ba eskalasaun sira ne'ebé joven liu. Metodolojia serbisu ida ne'ebé oinseluk, la'ós de'it iha kampu laran maibé dezenvolve mós ha'u nia ideia sira iha liu", nia afirma.
Eis-treinador adjuntu hosi Olhanense no hosi Académica asina kontratu menus hosi fulan tolu hafoin to'o iha Díli hanesan hodi treina Boavista FC Timor, kampeaun hosi époka ikus hosi Liga Futebol Amador (LFA) timoroan nian.
"Ha'u ko'alia ona ho prezidente Boavista nian no ha'u haree hanesan projetu ida ne'ebé interesante tebes, liuliu tanba ekipa sai ona hanesan kampeaun no iha ambisaun hodi ba Tasa Aziátiku Futebol nian", nia hatete.
"Agora daudaun ha'u iha serbisu rua tanba falta fulan rua hodi hakotu kampeonatu. Ha'u sei hamutuk nafatin ho Boavista to'o rohan. No ha'u sei dedika kompletu ba selesaun", afirma.
Ba Timor-Leste, Flora iha esperiénsia hosi Primeira Liga no mós pasajen sira liuhosi Itália no Myanmar, nasaun ne'ebé nia ajuda hodi iha kontatu ho jogu sira hosi sudeste aziátiku no ho realidade lokal.
Iha final hosi jornada dalima hodi Divizaun dahuluk hosi Liga Futebol Amador, Boavista FC Timor iha fatin datoluk, ho pontu hanesan ho klasifikadu daruak, Lalenok United FC no pontu rua hosi líder, AS. Ponta Leste.
Flora substitui japunés Norio Tsukitate, ne'ebé foin lalais ne'e halo krítika maka'as sira hasoru jogador sira no hasoru autoridade timoroan sira, liuliu tanba atrazu sira iha obra sira hosi Estádiu Munisipal Díli nian ne'ebé impede nasaun hodi simu jogu internasional sira dezde tinan 2015.
"Ha'u hanesan treinador tinan ida nia laran no ha'u halo ona apelu beibeik ba federasaun hodi rezolve buat hotu hodi bele halo jogu sira iha rai laran. Maibé hanesan komplikadu no ha'u senti kolen hodi husu beibeik", nia hatete iha fulan-Juñu.
Atrazu iha obra sira hanesan polémika foun ne'ebé maka afeta iha futebol timoroan.
Iha tinan 2017, FIFA aumenta, iha nível mundial, kastigu ida ne'ebé fó hosi Komisaun Disiplinar hosi Konfederasaun Aziátiku Futebol (CAF) nian ba sekretáriu-jeral hosi Federasaun Futebol Timor-Leste nian, kulpadu uza dokumentu falsu sira hodi regulariza jogador brazileiru sira.
Iha loron 20 Janeiru tinan hanesan, Konfederasaun Aziátiku Futebol (CAF) suspende ona Timor-Leste hosi edisaun tinan 2023 hosi Tasa Aziátiku hafoin konprova katak federasaun timoroan uza ona jogador brazileiru na'in 12 ho dokumentu nasionalidade falsu.
Iha Jullu tinan hanesan, CAF suspende ona, durante moris tomak, antigu diretor tékniku hosi Asosiasaun Futebol Timor-Leste nian, Orlando Marques Henriques, hosi atividade tomak ne'ebé iha relasaun ho futebol.
Desizaun mosu hafoin prova tiha katak Orlando Marques Henriques aseita subornu ida ho dolar rihun 15 hodi oferese ba jogador sira hosi ekipa futebol Timor-Leste nian, hodi nune'e lakon ho jogu hasoru Malázia, ne'ebé halo iha loron 30 Maiu, iha Jogu sira hosi Sudeste Aziátiku tinan 2015 nian, iha Singapura.
Iha final tinan 2017, Komité Disiplinar FIFA nian fó ona kastigu ba selesaun futebol Timor-Leste nian ho lakon hitu iha kualifikasaun ba Mundial2018, tanba jogador sira ne'ebé la eleitu, nune'e mós multa ida hamutuk rihun 70 franku suisu (euro rihun 60 resin).
Fonte: Ajénsia Lusa