UEFA sei hili susesór Infantino iha sesta-feira ne’e
Gregu Theodore Theodoridis sai favoritu atu asume kargu hanesan sekretáriu-jerál UEFA nian.
Foto: DR
Komité Ezekutivu UEFA sei reune iha sesta-feira ne’e atu deside sé maka sai sekretáriu-jerál foun no susesór Gianni Infantino, ne’ebé eleitu ona iha semana kotuk ba prezidente FIFA, informa fonte organizmu ne’e ba ajénsia AFP.
Tuir imprensa lokál, gregu Theodore Theodoridis sai hanesan favoritu atu asume kargu ne’e, buat ne’ebé tenki halo duni hanesan interino to’o rezolve situasaun prezidente Michel Platini nian.
Dirijente fransés hetan suspensu durante tinan neen tamba simu ilegalmente millaun euro 1,8 hosi Joseph Blatter, antigu prezidente FIFA, iha 2011, hetan alegasaun iha trabalu konsultadoria realiza iha 2002.
Theodoridis ligasaun ho UEFA iha kedas 2008 no agora okupa kargu hanesan diretór federasaun nasionál. Antes tama ba organizmu ne’e nia kaer ona futeból europeu, hanesan dirijente iha Federasaun Futeból Gregu nian (HFF).
SAPO TL ho SAPO Desportu