United sei husu ba Mourinho atu hein to’o 2017
Klube inglés ne’e hakarak atu tékniku portugés bele substitui Van Gaal bainhira kontratu olandés ne’e remata.
Foto: JOSÉ COELHO / LUSA
Manchester United sei husu ba José Mourinho atu hein tan tinan ida no komprometidu ho klube iha 2017. Informasaun ne’e fó sai iha oras ikus hosi jornál The Sun, ne’ebé bele haree hanesan inesperada ida kontráriu ba iha tékniku portugés.
Hafoin fó sai katak sei fila fali ba banku suplente iha époka 2016/17, José Mourinho agora bele sai frustradu iha ninia vontade atu kontinua iha Inglaterra.
Diáriu britâniku ne’e refere katak Ed Woodward, vise-prezidente Man. United, deside ona atu respeita kontratu ho olandés Louis Van Gaal, ne’ebé sei termina deit iha 2017, maski hamosu tristeza boot iha Old Trafford époka ida ne’e.
Iha notísia ne’e haktuir katak Ed Woodward konfiante atu Mourinho bele aseita esperiénsia époka ida iha liga milionáriu xinesa molok fila mai United hodi substitui Van Gaal.
Rekorda katak imprensa desportiva nasionál no internasionál fó sai ona katak Mourinho halo dadauk ona servisu atu harii plantel 'red devils' ba iha époka oin mai.
SAPO TL ho SAPO Desportu