Willian: "FC Porto iha kualidade maka’as"
Médiu brazileiru hosi Chelsea afirma katak ekipa José Mourinho sei fó volta ba faze ladi’ak ne’ebé daudauk ne’e sira hasoru.
Foto: CARL COURT / AFP
Willian
Brazileiru Willian ohin kalan marka golu hosi ekipa Chelsea ne’ebé kampeaun inglés lakon hasoru FC Porto, iha jogu segunda jornada Champions, maibé la tauk ba momentu aat ne’ebé ekipa 'blues' hasoru.
"FC Porto iha kualidade maka’as, ho jogadór lalais ba oin. Ita hatene ida ne’e, maibé ami mai ho propózitu atu manán iha ne’e. Susar mai ita bainhira atu buka rezultadu iha segunda parte, maibé ba oin sei iha jogu barak tan", analiza médiu ne’e.
Liga ho jogu ne’ebé la di’ak hosi londrinu sira iha temporada ne’e, Willian maka halo esplikasaun no garante de’it katak balneáriu kontinua hamutuk no hosi treinadór José Mourinho. "Susar atu esplika. Iha tinan kotuk ami hahú ho di’ak tebes, iha tinan ida ne’e laiha, tanba ami lakon jogu balun. Ami presiza kontinua serbisu no buka atu manán. Ha’u fiar katak ida ne’e sei sei akontese fila fali. Se iha tinan kotuk ami manán no ami hamutuk, iha tinan ida ne’e mós ami lakon hamutuk".
Chelsea sai ohin kalan hodi lakon 2-1 hosi FC Porto, iha Estádio do Dragão.
SAPO TL ho SAPO Desportu